मुंबई (वृत्तसंस्था) अजित पवार राज्याचे नवे मुख्यमंत्री होणार असल्याचा ठाम दावा दोन इंग्रजी न्यूज पोर्टलने केल्यामुळे पुन्हा एकदा राज्याच्या राजकारणात खळबळ उडाली आहे. धक्कादायक म्हणजे या वृत्तात मुख्यमंत्री एकनाथ शिंदे यांच्यासह शिवसेनेचे 16 आमदार अपात्र ठरणार असल्याचेही म्हटले आहे.
याबाबतचे वृत्त रेडिफ, फर्स्टपोस्ट आणि बिझनेस वर्ल्ड या इंग्रजी पोर्टलने दिले आहे. यामुळे मुख्यमंत्री एकनाथ शिंदे यांच्या नेतृत्वातील शिवसेनेसह राज्याच्या राजकारणातही मोठी खळबळ उडाली आहे. या वृत्तानुसार अजित पवार संसदेचे पावसाळी अधिवेशन संपल्यानंतर येत्या 11 ऑगस्ट रोजी महाराष्ट्राच्या मुख्यमंत्रीपदाची शपथ घेतील. महाराष्ट्र विधानसभेचे अध्यक्ष राहुल नार्वेकर मुख्यमंत्री एकनाथ शिंदे यांच्यासह शिवसेनेच्या 16 आमदारांना अपात्र घोषित ठरतील. त्यानतंर त्यांना मुख्यमंत्रीपदाचा राजीनामा देण्याचे निर्देश देतील. यामुळे आपसूकच राज्य मंत्रिमंडळ बरखास्त होईल, असे इंग्रजी पोर्टलने सूत्रांचा दाखला देत म्हटले आहे. एवढेच नव्हे तर भाजपच्या केंद्रीय नेतृत्वाच्या आशीर्वादाने दिल्लीत हा फॉर्म्युला ठरवण्यात आला आहे.
एकनाथ शिंदे यांनी 20 जून 2022 रोजी उद्धव ठाकरेंविरुद्ध बंड करून भाजपसोबत सरकार स्थापन केले होते. तत्पूर्वी, अजित पवार केंद्रीय गृहमंत्री अमित शहा व देवेंद्र फडणवीस यांच्याशी मार्च 2022 पासून नियमित संपर्कात होते. पण भाजपने अजित पवारांना मुख्यमंत्री करण्याची मागणी फेटाळल्यामुळे अखेरच्या क्षणी ही बोलणी फिस्कटली, असा दावा देखील या वृत्तात करण्यात आला आहे. तसेच शिंदेंच्या बंडखोरीपूर्वीच अजित पवार यांना मुख्यमंत्री करण्याची मागणी मान्य केली असती, तर त्यांनी भाजपसोबत सरकार स्थापन केले असते, असेही या वृत्तात म्हटले आहे. दरम्यान, या वृत्तामुळे मुख्यमंत्री एकनाथ शिंदे यांच्या नेतृत्वातील शिवसेनेसह राज्याच्या राजकारणातही मोठी खळबळ उडाली आहे.
