जळगाव (प्रतिनिधी) पाचोरा तालुक्यातील नगरदेवळा येथील एका तीन वर्षाच्या अल्पवयीन मुलीवर लैंगिक अत्याचार केल्याप्रकरणी न्यायालयाने आज नराधम आरोपीस मरेपर्यंत जन्मठेपेची शिक्षा सुनावली आहे. दरम्यान, या खटल्यात सरकार पक्षातर्फे अॅड. केतन ढाके यांनी साक्षीदारांच्या साक्षी नोंदवून प्रभावी युक्तिवाद केला होता.
यासंदर्भात अधिक असे की नगरदेवळा येथील बेडरपुरा भागातील एका तीन वर्षाच्या अल्पवयीन मुलीला चॉकलेटचे आमिष दाखवून किशोर उर्फ पिंटू निंबा भुई याने २६ मार्च २०१९ रोजी दुपारी दोन वाजेच्या सुमारास लैंगिक अत्याचार केला होता. यासंदर्भात पीडित मुलीच्या आईने पाचोरा पोलीस स्थानकात भादवि कलम ३५४, ३४६ आणि बालकांचे लैंगिक अत्याचार प्रतिबंध अधिनियम २०१२ चे कलम ३,४,५ एम ६,७ व ८ नुसार फिर्याद दिली होती. सदर खटला न्यायाधीश आर.जे. कटारिया यांच्या न्यायालयासमोर चालला. त्यात सरकार पक्षातर्फे एकूण १० साक्षीदार तपासण्यात आले. यात पीडित तीन वर्षाच्या मुलीची साक्ष व इतर साक्षीदारांच्या साक्षी या खूप महत्त्वपूर्ण ठरल्या.
न्यायालयासमोर आलेल्या साक्षीपुरावे अंती न्यायालयाने आरोपी किशोर भोई यास कलम ३७६ व ३७६ ब खाली मरेपर्यंत जन्मठेप आणि अडीच हजार रुपयांचा दंड अशी शिक्षा सुनावली. या खटल्यात सरकार पक्षातर्फे शासकीय अभियोक्ता अॅड. केतन ढाके यांनी साक्षीदारांच्या साक्षी नोंदवून प्रभावी युक्तिवाद केला. तसेच तीन वर्षे वयाच्या लहानग्या मुली सोबत केलेले कृत्य समाजात नात्यांच्या व माणुसकीच्या प्रतिमेला काळिमा फासणारे आहे, असाही युक्तिवाद केला. न्यायालयासमोर आलेले पुरावे प्रभावी युक्तीवाद यामुळे न्यायालयाने आरोपी किशोर भाऊ यास दोषी ठरवित शिक्षा सुनावली. याकामी पैरवी अधिकारी देविदास कोळी यांनी सहकार्य केले.
