धरणगाव (प्रतिनिधी) नाशिक परिक्षेत्राचे विशेष पोलिस महानिरिक्षकांच्या पथकाने आज शहरातील कमल जिनिंगमध्ये मोठ्या प्रमाणात धान्यसाठा जप्त केल्याची माहिती समोर येत आहे. तर कारवाई सुरु असून थोड्यावेळात पोलीस स्थानकात आल्यावर सर्व माहिती देऊ, असे पथकातील एका पोलीस कर्मचाऱ्याने सांगितले. दरम्यान, या कारवाईमुळे शहरात प्रचंड खळबळ उडालीय.
सूत्रांनी दिलेल्या माहितीनुसार शहरातील कमल जिनिंगमध्ये आज मोठ्या प्रमाणात धान्य येणार असल्याची गुप्त माहिती नाशिक परिक्षेत्राचे विशेष पोलिस महानिरिक्षकांच्या पथकाला मिळाली होती. त्यानुसार तीन ते चार जणांच्या एका पथकाने आज दुपारी बारा वाजेच्या सुमारास कमल जिनिंगमध्ये अचानक धाड टाकली. यावेळी मोठ्या प्रमाणात गहू आणि तांदूळची पोती आढळून आल्याचे कळतेय. दुसरीकडे पोलिसांच्या पथकाने याबाबत महसूलच्या अधिकाऱ्यांना माहिती देत बोलावून घेतले. त्यानुसार धरणगाव तहसीलमधून एक अधिकारी घटनास्थळी गेले. परंतू पोलीस कारवाईबाबत कोणतीही पूर्वसूचना नसल्यामुळे पंचनामा करण्यास असमर्थता दर्शवित वरिष्ठांना याबाबत कळविण्याचे सांगितले. घटनास्थळी दोन रिक्षातही धान्यसाठा आढळून आल्याची माहिती सूत्रांनी दिली.
दरम्यान, पोलिसांनी जप्त केलेला साठा रेशनचा आहे का की, खाजगी ? याची माहिती मिळविण्यासाठी सॅम्पल लॅबला पाठवण्यात येणार असल्याचेही कळते. तर या कारवाईबाबत अनेक जण फोन करून एकमेकाला विचारत होते. दुसरीकडे धरणगाव पोलिसात अद्याप कुठलीही नोंद नाहीय. तर घटनास्थळी नुकतेच पोलीस निरीक्षक शंकर शेवाळे, सपोनि गणेश अहिरे यांच्यासह पोलीस कर्मचारी पोहचले आहेत.
