जळगाव (प्रतिनिधी) राष्ट्रवादीचे नेते आणि माजी मंत्री एकनाथराव खडसे यांना कोरोनाची लागण झाली आहे. खडसे उपचारासाठी मुंबईकडे रवाना झाले आहेत. काही दिवसांपूर्वी खडसे यांच्या कन्या रोहिणी खडसे यांना देखील कोरोनाची लागण झाली होती.
माझ्या सान्निध्यात आलेल्या लोकांनी कोरोनाची चाचणी करून घ्यावी, तसेच मी बरा होईपर्यंत भेटण्यास येऊ नये, असं आवाहनही एकनाथ खडसे यांनी केले आहे. काही दिवसांपूर्वी प्रकृती उत्तम असून खबरदारी म्हणून रुग्णालयात दाखल होत असल्याची माहिती खुद्द रोहिणी खडसे यांनी दिली होती. रोहिणी खडसे यांनी कोरोनाची चाचणी केल्यानंतर त्यांचा अहवाल पॉझिटिव्ह आला होता. त्यामुळे प्रकृती उत्तम असली तरी खबरदारीचा उपाय म्हणून त्यांनी रुग्णालयात दाखल होण्याचा निर्णय घेतला होता. त्यानंतर आता एकनाथराव खडसेंनाही कोरोनाची लागण झाल्याचे समोर आले आहे.
