जळगाव (प्रतिनिधी) जामनेरचे माजी नगराध्यक्ष पारस ललवाणी यांच्याकडे २५ लाख रुपयांची खंडणीची मागणी करणा-या श्रीरामपूर येथील महिलेला खंडणीतील ५० हजार रुपयांची खंडणी लासलगाव येथील एका लॉजवर स्वीकारताना बुधवारी दुपारी लासलगाव पोलिसांनी अटक केली आहे. या महिलेला मदत करणाऱ्या अन्य दोघांविरोधातही गुन्हा दाखल करण्यात आला आहे. दरम्यान, या वृत्तास एपीआय राहुल वाघ तसेच फिर्यादी अल्केश ललवाणी यांनी दुजोरा दिला आहे.
जळगाव जिल्ह्यातील जामनेर येथील ललवाणी कुटुंबियांवर बाल विवाह प्रतिबंधक कायदा अन्वये गुन्हा दाखल केला असून या गुन्ह्यात मदत करण्याकरिता तक्रारदार महिलेने ही मागणी केली होती.
याप्रकरणी लासलगाव पोलिसांनी दिलेली माहिती अशी की, जळगाव जिल्ह्यातील जामनेर येथील अल्केश झुंबरलाल ललवाणी व त्यांचे भाऊ पारस ललवाणी यांचे विरोधात श्रीरामपूर येथील ज्योती चंदुलाल कोठारी या महिलेने जामनेर पोलीस ठाणे येथे गुन्हा रजिस्टर नंबर 68 / 2021 बाल विवाह प्रतिबंधक कायदा बालकांचे लैंगिक अपराध यापासून संरक्षण आदी कलमान्वये गुन्हा दाखल केलेला होता. या गुन्ह्यात मदत करण्यासाठी व गुन्हा मागे घेण्यासाठी या ज्योती कोठारी महिलेने व तिच्या साथीदारांनी सुमारे २५ लाख रुपयांची खंडणी ललवाणी कुटुंबियांकडून मागितली होती. सदर रक्कम ही नाशिक जिल्ह्यातील निफाड तालुक्यातील लासलगाव येथील ऐश्वर्या लॉज या ठिकाणी द्यावे असे महिलेने सांगितले होते. याप्रकरणी अल्केश झुंबरलाल ललवाणी यांनी लासलगाव पोलीस कार्यालयात तक्रार दिल्यानंतर पोलिसांनी ही कारवाई केली.
अल्केश झुंबरलाल ललवाणी यांच्या तक्रारीननंतर बुधवारी दुपारी लासलगावचे सहाय्यक पोलीस निरीक्षक राहुल वाघ यांच्यासह पोलीस कर्मचाऱ्यांनी ऐश्वर्या लॉज येथे धाड टाकली. त्यात खंडणी मागितलेल्या रकमेपैकी सुमारे ५० हजार रुपयांचा ऐवज घेताना श्रीरामपुर येथील एका महिलेला अटक करण्यात आली आहे. या गुन्ह्यांमध्ये या महिलेला मदत करणारे प्रफुल लोढा, रा. जामनेर, सुनील कोचर रि. सिल्लोड, जि. औरंगाबाद यांच्यावर गुन्हा दाखल करण्यात आला आहे.
दरम्यान, आरोपी महिलेने जळगाव जिल्ह्यातील ललवाणी ज्यांच्याविरुद्ध खोटा गुन्हा दाखल करण्यासाठी एका बड्या नेत्याने आर्थिक अमिश दिल्याचे सांगितले असल्याचेही कळते.
