नागपूर (वृत्तसंस्था) मानलेल्या बहिणीवरच भावाचे प्रेम जडले आणि वारंवार तिला लग्न करण्याची तरुण गळ घालत होता. मात्र आडनाव एकच असल्यामुळे तरुणीने त्याला नकार दिला. त्यामुळे चिडलेल्या तरुणाने तिचा पाठलाग करून अश्लील चाळे केले. यामुळे तरुणीने होणाऱ्या पतीसह गिट्टीखदान पोलिस ठाणे गाठून मानलेल्या भावाविरुद्ध विनयभंगाची तक्रार दिली. पोलिसांनी गुन्हा दाखल करून आरोपीला अटक केली.
पोलिसांनी दिलेल्या माहितीनुसार, २१ वर्षीय तरुणी ही शिक्षण घेते. ती मूळची गोंदियाची आहे. तिचे आई-वडील नागपुरात कामगार आहेत. तिच्याच गावातील तरुण नागपुरात कामाच्या शोधात आला. नागपुरात तो खाद्य पदार्थाच्या डिलेव्हरीचे काम करू लागला. त्याची ओळख तरुणीशी झाली. दोघांचेही आडनाव एकत्र असल्यामुळे त्याला तिने घरी बोलावले आणि आई-वडिलांशी ओळख करून दिली. तिला त्याने बहीण मानले. त्यामुळे तो वारंवार तिच्या घरी ये-जा करीत होता. भाऊ-बहिणीचे नाते असल्यामुळे त्यांच्याकडे कुणीही संशयाच्या नजरेने बघितले नाही. दोघांची मैत्री वाढत गेली. युवक तिच्यावर एकतर्फी प्रेम करायला लागला. दोघांमध्ये आकर्षण वाढले. तिलाही तो आवडायला लागला. दोघेही सोबत फिरत होते. दरम्यान, त्याने तिचे काही फोटो काढले. तिच्या सोबत काही सेल्फी काढल्या होत्या. यानंतर त्याने तिला लग्नाची मागणी घातली. परंतु, तरुणीने त्याला आडनाव एकच असल्यामुळे कुटुंबीय काय म्हणतील, असा सवाल केला.
मात्र, युवक काही ऐकायला तयार नव्हता. तो वारंवार तिला लग्न करण्याची गळ घालत होता. कुटुंबीयांनी नागपुरातील युवकाशी तिचे लग्न ठरविले. त्याने तिला लग्न न करण्यासाठी दमदाटी करीत धमकीही दिली. मात्र, तिने शेवटपर्यंत नकार देत साक्षगंध उरकून घेतले. त्यामुळे चिडलेल्या युवकाने तिच्या पतीचा मोबाईल क्रमांक घेऊन प्रेमप्रकरणाची माहिती दिली व लग्न न करण्याचा सल्ला दिला. त्यानेही होणाऱ्या पत्नीला विचारपूस केली. तिने थेट नकार देऊन सर्व हकिकत सांगितली. भविष्यातही हा त्रास देईल, या भीतीने तिने होणाऱ्या पतीसह गिट्टीखदान पोलिस ठाणे गाठून मानलेल्या भावाविरुद्ध विनयभंगाची तक्रार दिली.
