नवी दिल्ली (वृत्तसंस्था) बुल्लीबाई (Bulli Bai) हे नाव समोर आल्यानंतर सोशल मीडिया आणि राजकीय वर्तुळात खळबळ उडाली आहे. वास्तविक एका वादग्रस्त अॅपवर मुस्लिम महिलांचे छायाचित्र परवानगीशिवाय अपलोड करण्यात आले आहे. यासोबत फोटोंसोबत किंमत टॅग – डील ऑफ द डे असे लिहिले आहे. म्हणजेच महिलांच्या लिलावासाठी हा किमतीचा टॅग लावण्यात आला आहे. मागीलवर्षी सुल्ली डील्स (Sulli Deals) नावाने असाच प्रकार उघडकीस आला होता. बुल्ली बाई आणि गिटहब (GitHub) म्हणजे काय? याबद्दल आता विस्ताराने माहिती घेऊयात.
बुल्लीबाई या अॅपच्या माध्यमातून मुस्लिम समाजातील महिलांची हुतूपुरस्सर बदनामी केली जात असल्याचा प्रकार उघडकीस आल्याने देशभरात मोठं वादळ उठलं आहे. सोशल मीडियात सक्रिय असलेल्या महिलांना यात टार्गेट करण्यात येत असल्याचेही स्पष्ट झाले आहे. याप्रकरणी दिल्ली आणि मुंबईत गुन्हे दाखल करण्यात आले असून मुंबई पोलिसांनी मोठी कारवाई करत एका सिव्हिल इंजिनीअरिंगच्या विद्यार्थ्याला बेंगळुरूतून अटक केली आहे तर उत्तराखंडमधील एका महिलेलाही ताब्यात घेण्यात आले आहे. गंभीर बाब म्हणजे ही महिला यात मुख्य आरोपी असल्याचे सांगण्यात येत असून येत्या काही दिवसांत अधिक धक्कादायक माहिती पुढे येण्याची शक्यता आहे.
गेल्या काही दिवसांपासून बुल्लीबाई अॅप चर्चेत आहे. काही महिन्यांपूर्वी अशाचप्रकारे सुल्लीडील्स हे अॅप वादाचे कारण ठरले होते. हे इतर अॅपसारखेच एक अॅप असले तरी त्यावर चालणारे धक्कादायक प्रकार वादाचे कारण ठरले आहेत. आधी सुल्लीडील्सवर मुस्लिम महिलांची बोली लावली जायची. त्यावरून वादळ उठताच ते अॅप ब्लॉक केले गेले मात्र त्यानंतर बुल्लीबाई नावाने तसेच अॅप डेव्हलप केले गेले. त्यावर सोशल मीडियात सक्रिय असलेल्या १०० महिलांचे फोटो टाकून त्यांचा लिलाव मांडण्याचा प्रकार केला गेला. दिल्लीतील एका महिला पत्रकाराचाही त्यात मॉर्फ केलेला आक्षेपार्ह फोटो पोस्ट करण्यात आला होता. याबाबत संबंधित महिला पत्रकाराने पोलिसांकडे तक्रार केल्यानंतर या प्रकरणाने अधिक गंभीर वळण घेतले. त्यानंतर हे अॅपही ब्लॉक करण्यात आले असले तरी याच्या मुळाशी कोण आहे, हे शोधण्याचे मोठे आव्हान तपास यंत्रणांपुढे आहे.
बुल्लीबाईवर नेमकं काय चालायचं?
बुल्लीबाई हे अॅप गुगल प्ले स्टोअर किंवा अॅप स्टोअरवर उपलब्ध नव्हते. गिटहब या प्लॅटफॉर्मवर हे अॅप लॉन्च करण्यात आले होते. सोशल मीडियात अॅक्टिव्ह असलेल्या महिलांवर बोली लावण्याचा प्रकार या अॅपवर चालत होता. अॅप ओपन करताच स्कीनवर मुस्लिम महिलांचे फोटो यायचे आणि त्यावर नावासह प्राइसटॅगही असायचे. बुल्लीबाई या नावाने असलेल्या ट्वीटर हँडलवरही त्याचे प्रमोशन केले जात होते. हा धक्कादायक प्रकार समोर आल्यानंतर केंद्र सरकारने त्याची गंभीर दखल घेतली व कारवाईचे निर्देश दिले. त्यानुसार हे अॅप डेव्हलप करणाऱ्या युजरला तत्काळ ब्लॉक केले गेले आहे. हे अॅपही हटवण्यात आले आहे.
गिटहब काय आहे?
बुल्लीबाई अॅप गिटहब प्लॅटफॉर्मवर उपलब्ध करण्यात आले होते. त्यामुळे या प्लॅटफॉर्मबाबतही जाणून घेणे महत्त्वाचे आहे. गिटहब हा एक ओपन सोर्स प्लॅटफॉर्म आहे. गिटहबच्या युजरला कोणतेही नवे अॅप क्रिएट करण्याची आणि ते शेअर करण्याची मुभा आहे. या प्लॅटफॉर्मवर तुम्ही पर्सनल किंवा प्रोफेशनल कोणत्याही प्रकारचे अॅप डेव्हलप करू शकता.
