भुसावळ (प्रतिनिधी) बंगळुरूच्या महालक्ष्मीपुरम येथील एका घरातून साडेपाच किलो सोने व रोकड असे मिळून दोन कोटी ७८ लाख ९५ हजार रुपयांचा ऐवज चोरून पसार झालेल्या संशयिताच्या भुसावळात मुसक्या आवळण्यात आल्या. भुसावळ आरपीएफने एलटीटी-गोरखपूर एक्स्प्रेसच्या ए-१ या डब्यातून संशयितास जेरबंद केले. या संशयिताला आरपीएफने शुक्रवारी (दि. १७) सकाळी बंगळुरू पोलिसांच्या ताब्यात स्वाधीन केले.
भुसावळ आरपीएफने अटक केलेला संशयित उपेंद्र प्रदीप शाही (वय ३५, रा. पंनथुरु, मेन रोड, शोभा ड्रिम इकर, बंगळुरू, कर्नाटक) या संशयितांकडे तीन हजार ९०० रुपयांचे नेपाळी चलन, तर भारतीय चलनाचे १४ हजार रुपये मिळाले आहेत.
आरपीएफ निरीक्षक आर. के. मीना यांनी दिलेल्या माहितीनुसार, रेल्वे सुरक्षा दलाचे आयुक्त एच. श्रीनिवास राव यांनी मोठ्या चोरीतील संशयित एलटीटी-गोरखपूर या गाडीने जात असून, त्यांचा शोध घेऊन त्याला अटक करण्याच्या सूचना केल्या होत्या. ही गाडी गुरुवारी (दि. १६) रात्री १०.५५ वाजता भुसावळ जंक्शनमध्ये आली असता, आरपीएफ निरीक्षक मीना व त्यांचे सहकारी उपनिरीक्षक के. आर. तरड, उपनिरीक्षक एन. के. सिंग, उपनिरीक्षक सुभाष राजपूत आणि कर्मचाऱ्यांनी गाडीची तपासणी केली.
गाडी रावेर स्थानकावर थांबल्यावर संशयिताच्या मुसक्या आवळून त्याला ताब्यात घेण्यात आले. त्यानंतर उपनिरीक्षक के. आर. तरड, महेंद्र कुशवाह, के. एस. वसावे, विनोद कुमार आणि ए. ए. हंसराज वर्मा यांनी अन्य गाडीने संशयितास भुसावळला आणले. दरम्यान, संशयित उपेंद्र शाही याच्याविरोधात देशातील वेगवेगळ्या शहरांमध्ये गुन्हे दाखल आहेत. यात मुंबई, बंगळुरू, मंगळूर, सुरत, वर्सोवा, कोसंबा (सुरत), अप्पर पेठ, वाशी, कुकटपल्ली येथे विविध कलमांन्वये त्याच्याविरोधात गुन्हे दाखल असल्याची माहिती पोलिसांनी दिली.
