मुक्ताईनगर (प्रतिनिधी) स्विफ्ट डिझायर कारमधून येत एका रिक्षा चालकाला मारहाण करून त्याच्याकडून रोकड लुटल्याप्रकरणी मुक्ताईनगर पोलिसात ६ जणांविरुद्ध गुन्हा दाखल करण्यात आला आहे. विशेष म्हणजे पळून जाण्याच्या तयारीत असतांना पुर्नाड फाट्यावर ट्रक आडवे लावून संशयिताना वाहतूक पोलिसांनी ताब्यात घेतले.
या संदर्भात रिक्षा चालक देविदास रामदास तायडे (वय, ४० रा. चिंचखेडा ता. मुक्ताईनगर) यांनी फिर्याद दिली आहे. त्यानुसार दि. २८ सप्टेंबर रोजी दुपारी चार वाजेच्या सुमारास वायला फाट्याजवळ त्यांच्या रिक्षाच्या बाजूला एक पांढऱ्या रंगाची स्विफ्ट डिझायर कार क्रमांक (MH ०२ BZ ७९३८) ही उभी राहिली. त्यानंतर त्यातून ६ जण खाली उतरले आणि त्यांनी तायडे यांना रस्त्याबाबत विचारपूस केली. यातील दोघांनी तायडे यांना रिक्षाच्या खाली ओढुन त्यांच्या कारमध्ये बसविण्याचा प्रयत्न केला. याचवेळी तायडे यांच्या खिशातील १६०० रुपये आणि मोबाईल जबरीने काढून घेतला. एवढेच नव्हे तर तायडे यांना सर्वांनी लाथा बुक्यांना मारहान करुन कार पुर्नाड फाट्याच्या दिशेने पळवून नेली.
याबाबत पोलिसांना माहिती मिळताच पुर्नाड फाट्यावर वाहतूक पोलिसांनी दोन ट्रक आडवे लावत कार अडवून संशयितांना ताब्यात घेतले. विशेष म्हणजे पोलिसांना कारमध्ये छर्र्यांची नकली बंदूक देखील सापडली. पोलिसांनी अधिक चौकशी केली असता त्यांची नावं हुसेन गुलाम रसूल शाह (वय, २०), शेख समीर शेख शकील (वय २०), फय्याज खान रियाज खान (वय २०), शे. तौसीफ शे. शकील (वय २०), रिजवान शहा रफिक शहा (वय २०), अमीर खान, शब्बीर खान (वय २१, सर्व राहणार मालेगाव ) असे असल्याची सांगीतले. दरम्यान, पैसे संपल्यामुळे या सर्वांनी रिक्षा चालकाकडून लुटमार केल्याची प्राथमिक माहिती समोर आली आहे. दरम्यान, याप्रकरणी दरोड्याचा गुन्हा दाखल करण्यात आला असून पुढील तपास पो.नि. शंकर शेळके यांच्या मार्गदर्शनाखाली पोउपनिरी राहुल बोरकर हे करीत आहेत.
