जळगाव (प्रतिनिधी) गेल्या सहा महिन्यांपासून ती सीडी मी पोलिसांकडे दिलेली आहे. पोलिस चौकशी करत आहेत. चौकशीचा अहवाल आला की मी अहवाल जाहीर करणार आहे, असे म्हणत योग्य वेळी मी सीडी लावणार आहे, असा इशारा राष्ट्रवादी काँग्रेसचे नेते एकनाथ खडसे यांनी पुन्हा एकदा दिला आहे.
प्रसारमाध्यमांशी बोलतांना माजी मंत्री एकनाथ खडसे यांनी अनेक मुद्यांवर चर्चा केली. खडसे यांच्या मागे ईडी लागली असली तरी ते सीडी दाखवत नसल्याने विरोधक त्यांच्यावर टीका करत होते. यावर त्यांनी बोलताना ईडी लावली तर सीडी लावेन असं मी म्हणालो होतो; हे खरं आहे. गेल्या पाच सहा महिन्यांपासून ती सीडी पोलिसांकडे दिली आहे. पोलीस त्याची चौकशी करत आहेत. चौकशी अहवाल आल्यानंतर लवकरच मी हा अहवाल जाहीर करणार असल्‍यचे खडसे म्हणाले. मी गेली ४० वर्षे राजकारणात आहे. पण या काळात माझ्यावर एकही आक्षेप घेण्यात आलेला नाही. राजकारणात कधी कुणी माझ्या विरोधात बोलले नाही. पण जमिनीबाबतचा हा आरोप माझ्यावर हेतुपुरस्सर लावण्यात आलेला आहे. न्यायालयानेही सांगितले आहे की या आरोपांमध्ये तथ्य नाही. कर नाही त्याला डर कशाला, असे म्हणत आपण ईडीच्या चौकशीला सामोरे जात आहोत, असे खडसे म्हणाले. दरम्यान, राष्ट्रवादीचे नेते एकनाथ खडसे यांनी माझ्या मागे ईडी लावली तर सीडी बाहेर काढीन असे विधान केले होते. त्याच्या या विधानानंतर खडसेंची ईडीकडून चौकशी करण्यात आली. मात्र, बोलल्याप्रमाणे खडसे यांनी सीडी लावलेली नव्हती. आता मात्र, आता खडसेंनी योग्य वेळी सीडी लावण्याबाबत भाष्य केल्यामुळे पुन्हा एकदा सीडीचा विषय चर्चेत आला आहे.
