चाळीसगाव (प्रतिनिधी) – शहरात साखळीचोरीच्या घटना पुन्हा डोके वर काढत असून भडगाव रोड परिसरात मोटारसायकलवरून आलेल्या तिघा अज्ञात चोरट्यांनी महिलेच्या गळ्यातील सुमारे ७६ हजार रुपये किमतीची दोन तोळे वजनाची सोन्याची पोत हिसकावून नेल्याची धक्कादायक घटना शुक्रवारी (दि. ३) रात्री सुमारे ८ वाजता घडली. या प्रकारामुळे परिसरात भीतीचे वातावरण निर्माण झाले आहे. याप्रकरणी नीलिमा विकास बागड (रा. सप्तश्रृंगी नगर, टाकळी प्र.चा.) यांच्या फिर्यादीवरून चाळीसगाव शहर पोलीस ठाण्यात अज्ञात तिघांविरुद्ध भारतीय न्याय संहिता, २०२३ अंतर्गत कलम ३०४ (२) नुसार गुन्हा दाखल करण्यात आला आहे. पोलीस निरीक्षक अमितकुमार मनेळ यांच्या मार्गदर्शनाखाली पुढील तपास पोलीस करीत
आहेत. पोलिसांनी दिलेल्या माहितीनुसार, नीलिमा बागड या भाजीपाला घेऊन घरी परतत असताना डॉ. काकासाहेब पूर्णपात्रे माध्यमिक विद्यालयासमोरील गायत्री मेडिकल परिसरात दबा धरून बसलेल्या तिघा चोरट्यांनी मोटारसायकलवरून त्यांच्या जवळ येत गळ्यातील सोन्याची पोत जोराने ओढून भडगाव रोडच्या दिशेने पलायन केले. घटनेनंतर महिलेने तातडीने पती विकास बागड यांना फोन करून बोलावले. त्यांनी पोलिसांना माहिती दिल्यानंतर पोलिसांनी घटनास्थळी धाव घेत पंचनामा केला. परिसरातील सीसीटीव्ही कॅमेऱ्यांची तपासणी केली असता चोरटे फुटेजमध्ये कैद झाल्याचे समोर आले असून त्यांचा शोध सुरू आहे. पोलिसांनी नागरिकांना सतर्क राहण्याचे आवाहन केले आहे.
