चाळीसगाव (प्रतिनिधी) ट्रॅक्टरच्या कर्जाचे पैसे भरण्याकरिता माहेरून दोन लाख रुपये आणावे, म्हणून विवाहितेचा छळ करून तिच्या तोंडात विषारी औषध ओतून जीवे मारण्याचा प्रयत्न केल्याची धक्कादायक घटना उघडकीस आली आहे. याप्रकरणी पतीसह तिघांविरुद्ध चाळीसगाव ग्रामीण पोलिसात गुन्हा दाखल करण्यात आला आहे.
या प्रकरणी जयश्री दिनेश राठोड (वय २५, करगाव तांडा ता. चाळीसगाव) या विवाहितेने फिर्याद दिली आहे. त्यानुसार सन २०२० ते २०२२ च्या दरम्यान, वेळोवेळी ट्रॅक्टरचे कर्जाचे पैसे भरण्याकरिता दोन लाख रुपये तुझ्या माहेरुन घेऊन ये, असा छळ सुरु होता. पती दिनेश जुगराज राठोड, सासरे जुगराज राठोड, सासू जिजाबाई राठोड, जेठ वाल्मिक राठोड, जेठाणी गुड्डीबाई राठोड यांच्याकडून हा छळ सुरु होता. या सर्वांनी शिवीगाळ करुन मारहाण करुन मानसिक व शारिरिक त्रास दिला. तसेच विवाहितेच्या तोंडात काही तरी विषारी औषध टाकून जीवे मारण्याचा प्रयत्न केला. याप्रकरणी विवाहितेच्या फिर्यादीवरून पती, सासू, सासरे जेठ आणि जेठाणी यांच्याविरुद्ध गुन्हा दाखल करण्यात आला असून पुढील तपास सपोनि रमेश चव्हाण हे करीत आहेत.
