अमळनेर (प्रतिनिधी) राज्यातील शिक्षकांचे वेतन शालार्थमधून सीएमपी प्रणालीद्वारे करण्यात यावे, अशी मागणी शिक्षक आमदार कपिल पाटील यांनी मुख्यमंत्री तथा उपमुख्यमंत्री यांना एका पत्राद्वारे केली आहे.
राज्यातील शिक्षकांच्या वेतनाचा प्रश्न दिवसेंदिवस गंभीर बनत चालला असून एक एक, दोन दोन महिने विलंबाने पगार होत आहेत. ही फारच चिंतेची बाब आहे. राज्याने २०१३ पासून शिक्षकांचे वेतन १ तारखेलाच व्हावे म्हणून शालार्थ प्रणालीद्वारे वेतन देयके जमा करण्यास सुरूवात केली आहे. शासनाच्या धोरणानुसार वेतन देयके ही धनादेश विरहित करावयाची असल्याने, स्टेट बँक आॕफ इंडियाशी करार करून जिल्हा कोषागारातून प्रत्यक्ष शिक्षकांच्या खात्यावर वेतन जमा होण्यासाठी सीएमपी (कॕश मॕनेजमेंट प्राॕडक्ट) प्रणालीचा वापर करण्याच्या सुचना दिलेल्या आहेत. या प्रणालीद्वारे अदा होणारी रक्कम प्रत्यक्ष शिक्षकांच्या खात्यावर जमा होणार होती. त्यामुळे शिक्षकांचे वेतन हे १ तारखेलाच जमा होऊ शकले असते. परंतु शालार्थ प्रणाली अपडेट न केल्यामुळे तिचा वापर केवळ बजेट मागणीसाठीच होत आहे व सीएमपी प्रणाली राज्यात कुठेही कार्यान्वित नसल्यामुळे बजेट देऊनही वेतनास विलंब होत आहे. तरी शालार्थ मधून सीएमपी प्रणालीचा वापर करण्याच्या सुचना त्वरित देण्यात याव्यात, असे पत्र शिक्षक आमदार कपिल पाटील यांनी मुख्यमंत्री तथा उपमुख्यमंत्री यांना दिल्याचे नारायण आनंदा वाघ (जिल्हाध्यक्ष माध्यमिक), सोमनाथ ब्रिजलाल पाटील (जिल्हाध्यक्ष प्राथमिक) जळगाव यांनी कळविले आहे.
