चाळीसगाव (प्रतिनिधी) हॉस्पिटलमध्ये आयसीयुत उपचार घेणाऱ्या महिलेचा विनयभंग केल्याप्रकरणी चाळीसगाव न्यायालयाने डॉक्टरला विविध कलमान्वये दोन वर्षे सश्रम कारावास आणि सात हजार रुपये दंडाची शिक्षा सुनावण्यात आली आहे. मंगलसिंग परदेशी (वय ५०), असे दोषी डॉक्टरचे नाव आहे.
शहरातील श्री सिद्धिविनायक हॉस्पिटलमध्ये पिडीत महिला २५ ऑक्टोंबर २०१९ रोजी आयसीयूत उपचार घेत होती. डॉ. मंगलसिंग परदेशी यांनी ती आयसीयूत एकटी असताना पीडीत महिलेचा विनयभंग केला होता. याप्रकरणी पिडीत महिलेच्या फिर्यादीवरून चाळीसगाव शहर पोलिसांत डॉक्टरांविरुद्ध गुन्हा दाखल झाला होता. या प्रकरणात सहायक फौजदार बापूराव फकीरराव भोसले यांनी न्यायालयात दोषारोपपत्र सादर केले होते.
या फौजदारी खटल्याची सुनावणी चाळीसगाव येथील न्यायदंडाधिकारी एस. आर. शिंदे यांच्याकडे झाली. यात एकूण पाचजणांची साक्ष नोंदविण्यात आली. दि. २२ रोजी चाळीसगाव न्यायदंडाधिकारी वर्ग १ न्या. एस. आर. शिंदे यांनी आरोपी डॉ. परदेशी याला भादंवि ३५४ अन्वये दोन वर्षे सश्रम कारावासाची शिक्षा आणि ७००० रुपये दंड (दंड न भरल्यास २ महिने कारावास) अशी शिक्षा सुनावली. तसेच पीडित महिलेस रक्कम रुपये १० हजार नुकसान भरपाई देण्याचा आदेश देण्यात आला. सरकार पक्षातर्फे अॅड. मिलिंद येवले यांनी काम पाहिले. खटल्याची पैरवी पो. ना. रणजित सोनवणे यांनी, तर केस वॉच म्हणून पो. कॉ. प्रवीण देवरे यांनी काम पाहिले.
