चाळीसगाव (प्रतिनिधी) तालुक्यातील पिंप्री प्र.दे. येथे अवघ्या दोन महिन्याच्या चिमुकलीचा रूमालाने तोंड दाबून खून केल्याची खळबळजनक घटना घडली आहे. गुंजन सोनू ठाकरे (वय २ महिने) असे मृत चिमुकलीचे नाव असून, अरविंद कैलास पाटील (वय ४०, रा.पिंप्री प्र.दे.) असे संशयित आरोपीचे नाव आहे.
पिंप्री प्र.दे. येथील इंदिरानगर भागात शोभना सोनू ठाकरे (कोळी) (वय २७) ही महिला पती, मुले व आजोबांसह राहते. तिचा पती मोलमजुरी करतो. ११ रोजी रात्री १० वाजता नेहमी प्रमाणे सर्वजण झोपून गेले. त्यानंतर पहाटे शोभ यांना घरात कुणीतरी आल्याचा आवाज आला. तो गावातीलच अरविंद कैलास पाटील हा असल्याचे शोभनाने ओळखले. अरविंदने कोयत्याचा धाक दाखवत घरातील बिर्याणी खाल्ली. तसेच चिमुकली गुंजनच्या तोंडावर रुमाल दाबला. काही वेळाने संशयित अरविंद घराबाहेर पळून गेला. दिवस उजाडल्यानंतर मेहुणबारे पोलिसांना या घटनेची माहिती कळवली. पोलिसांनी चिमुकलीचा मृतदेह ग्रामीण रूग्णालयात नेला. मेहुणबारे पोलिसांत कलम ३०२, प्रमाणे गुन्हा दाखल झाला. दरम्यान, घटनास्थळी सहायक पाेलिस अधीक्षक ऋषीकेश रावले यांनी भेट दिली. संशयिताला पोलिसांनी ताब्यात घेतले आहे.
