चाळीसगाव (प्रतिनिधी) घरात किडे, झुरळ मारण्याचे औषधी फवारणी अर्थात पेस्ट कंट्रोल केल्याने घर बंद करून कुटुंबीय चुलतभावाकडे गेले होते. चोरट्यांनी नेमकी हीच संधी साधत बंद घराचे कडी-कुलूप तोडून तब्बल साडे चार लाखांचा ऐवज चोरून नेल्याची घटना शहरातील नारायणवाडी भागात रविवारी रात्री घडली. भर वस्तीत चोरी झाल्याने परिसरातील नागरिकांमध्ये भीतीचे वातावरण पसरलेले आहे.
पेस्ट कंट्रोल करून नातेवाईकाकडे गेले !
नारायणवाडी येथील घाटे पेट्रोल पंपासमोर अक्षय सुनील गंगेले यांचा फोटोग्राफीचा व्यवसाय आहे. त्यांनी १६ रोजी त्यांच्या घरात झुरळ, किडे मारण्याचे औषधाची फवारणी केली. त्यामुळे सर्व कुटुंब घराला कुलूप लावून शहरातच मालेगाव रोड भागात राहणाऱ्या चुलत भावाकडे गेले होते. दि. १९ रोजी सकाळी ८.३० वाजता गंगेले कुटुंबीय घरी परत आले असता त्यांना घराचा मुख्य दरवाजा उघडा दिसला तर कुलूप आणि सेंट्रल लॉक तुटलेले दिसले. घरातील सर्व कपडे व साहित्य अस्ताव्यस्त पडले होते. घराच्या वरील मजल्यावरील बेडरूममध्ये जावून पाहिले असता तेथील लोखंडी कपाटाचे लॉक तुटलेले व त्यातील कपडे बाहेर फेकलेले दिसले. तसेच कपाटातील सोन्या चांदीचे दागिणे, रोकड चोरल्याचे स्पष्ट झाले. अक्षय गंगेले यांच्या फिर्यादीवरून गुन्हा दाखल केला.
सोन्याच्या दागिन्यासह रोकड लंपास !
चोरट्यांनी घराचा दरवाजा तोडून कपाटातील १ लाख २० हजारांचे ३ तोळ्याचे सोन्याचे मंगळसूत्र, २ हजारांचे ८ ग्रॅमचे सोन्याचे मणी मंगळसूत्र, १२ हजारांचे मची सोन्याची नथ, २८ हजाराचे ग्रॅमचे सोन्याचे ७ तुकडे, २ लाख १६ हजाराचे प्रत्येकी ६ ग्रॅमच्या सोन्याच्या अंगठ्या, १०० रूपयांचे चांदीचे शिक्के, १५०० रूपयांचे चांदीचे ५ भारचे ब्रेसलेट, १५०० रूपयांचे चांदीचे १० जोडवे, ६०० रूपयांचे चांदीचे दिवे व २५ हजारांची रोकड असा ४ लाख ४८ हजार ५०० रुपयांचा ऐवज चोरला
