नवी दिल्ली (वृत्तसंस्था) कोरोनाचा नवा व्हेरिएंट ओमायक्रॉनने भारतात सुद्धा शिरकाव केला असून आता आणखी एक धक्कादायक बाब समोर आली आहे. दक्षिण आफ्रिकेतील डॉक्टरांचे म्हणणे आहे की, यावेळी ५ वर्षांहून कमी वयोगटातील मुलांमध्ये ओमायक्रॉन विषाणूचा संसर्ग वेगाने होत आहे. जरी मुलांना ओमायक्रॉनची लागण झाली नसली तरी मुलांमध्ये संसर्ग वाढण्याच्या शक्यतेने चिंता वाढली आहे.
दक्षिण आफ्रिकेतील नॅशनल इन्स्टिट्यूट ऑफ कम्युनिकेबल डिसीजेसच्या डॉ. वासिला जसॅट यांनी सांगितले की, “मुलांना कोणत्याही विषाणूचा संसर्ग होण्याचा धोका कमी असतो. पूर्वीच्या साथीच्या रोगांमध्येही असेच दिसून आले आहे. परंतू तिसऱ्या लाटेत ५ वर्षांखालील मुले आणि १५ ते १९ वर्ष वयोगटातील तरुणांची रुग्णालयात दाखल होण्याची संख्या वाढली होती आणि आता चौथ्या लाटेत सर्व वयोगटांमध्ये, विशेषत: ५ वर्षांखालील मुलांमध्ये संसर्ग वाढण्याचा ट्रेंड दिसून आला आहे. त्यांनी पुढे म्हटलं, “अपेक्षेप्रमाणे मुलांमध्ये संसर्गाचे प्रमाण अजूनही कमी आहे. परंतु ५ वर्षांपेक्षा लहान मुलांमध्ये ते अधिक वेगाने वाढत आहे. ६० वर्षांवरील वृद्धांना या विषाणूची सर्वाधिक लागण होते आणि बाधितांमध्ये दुसऱ्या क्रमांकावर ५ वर्षांखालील लहान मुलांची संख्या आहे. त्यामुळे यावेळी वेगळा ट्रेंड पहायला मिळत असल्याचंही ते म्हणाले.”
दक्षिण आफ्रिकेतील बाधितांपैकी ८० टक्क्यांहून अधिक हे गौतेंग प्रांतातील आहेत. येथील आरोग्य विभागाशी संबंधित डॉ. साकिसी मालुलेके यांनीही चिंता व्यक्त केली आहे. त्यांनी सांगितले की, यावेळी तरुणांमध्ये तसेच गर्भवती महिलांमध्ये संसर्ग वेगाने पसरत आहे. अपेक्षा आहे की, येत्या काही आठवड्यांत या वयोगटात संसर्ग झपाट्याने पसरण्यामागचं कारण आम्हाला कळेल.
