चोपडा (प्रतिनिधी) आमचे प्रेम प्रकरणाबाबत का सांगीतले?, तुला आम्ही नंतर पाहून घेऊ अशी धमकी दिल्याने भितीपोटी एका तरुणाने आत्महत्या केल्याची धक्कादायक घटना घडली आहे. याप्रकरणी प्रेमीयुगलाविरुद्ध गुन्हा दाखल करण्यात आला आहे. चंद्रशेखर राजेंद्र धनगर (वय १८, रा. वर्डी ता.चोपडा) असे मयत तरुणाचे नाव आहे.
या संदर्भात राजेंद्र भिका धनगर यांनी दिलेल्या फिर्यादीत म्हटले आहे की, त्यांचा मुलगा चंद्रशेखर याने २६ मे २०२२ रोजी गळफास घेऊन आत्महत्या केली होती. परंतू त्याला काजल गणेश धनगर (रा.नरवाडे, ह.मु. डांभूर्णी ता. यावल) आणि विक्की उर्फ वैभव प्रकाश माळी (रा. नरवाडे ता.चोपडा) यांनी धमकावले होते. दोघं संशयित आरोपीतांनी चंद्रशेखरला तू आमचे प्रेम प्रकरणाबाबत का सांगीतले?. तुला आम्ही नंतर पाहून घेऊ, अशी धमकी दिली होती. या भीतीपोटीच चंद्रशेखरने गळफास घेऊन आत्महत्या केल्याचे फिर्यादीत म्हटले आहे. याप्रकरणी दोघांविरुद्ध गुन्हा दाखल करण्यात आला असून पुढील तपास पोलीस उपनिरीक्षक घनशाम तांबे हे करीत आहेत.
