चोपडा (प्रतिनिधी) तालुक्यातील एका गावातील १३ वर्षीय चिमुकलीवर अत्याचार करून तिचा निर्घृणपणे खून केल्याची घटना शनिवारी समोर आली होती. या घटननंतर काही तासाताच पोलीसांनी संशयित आरोपीच्या मुसक्या आवळल्या आहेत. मुकेश पूना बारेला (वय-२२), असे अटक केलेल्या संशयित नराधमाचे नाव आहे.
चोपडा तालुक्यातील एका गावातील शेतमजुराच्या चार अल्पवयीन मुली स्वतः च्या शेतातून काम करून घराकडे परतत असताना १३ वर्षीय मुलीला मुकेश बारेला याने शेतात ओढून नेत अमानुषपणे अत्याचार करून चेहरा दगडाने ठेचून खून केल्याची घटना शनिवारी समोर आली होती. घडलेल्या घटनेपासून संशयित आरोपी हा फरार झाला होता. घटनेची माहिती मिळाल्यानंतर एलसीबी पथक, डॉग स्कॉड पथक , फॉरेन्सिक पथक, चाळीसगाव विभागाचे अप्पर पोलीस अधीक्षक चोपडा विभागाचे पोलीस अधिकारी घटनास्थळी दाखल झाले. त्यानंतर त्यांनी तपासाची चक्रे फिरविली.
घटनेच्या काही तासातच संशयित आरोपी मुकेश बारेला याला पोलीसांनी अटक केली आहे. याप्रकरणी हामा सुमला बारेला याच्या फिर्यादीवरून चोपडा शहर पोलिसात आरोपी मुकेश पुन्या बारेला याच्याविरोधात गुन्हा दाखल करण्यात आला आहे. पुढील तपास पो.नि कावेरी कमलाकर ह्या करीत आहे.
