चंदिगड (वृत्तसंस्था) भाजपच्या नवनिर्वाचित खासदार तथा बॉलीवूड अभिनेत्री कंगना राणावतला चंदिगड विमानतळावर मारहाण झाल्याचा धक्कादायक प्रकार गुरुवारी घडला. विमानतळावर तैनात ‘केंद्रीय औद्योगिक सुरक्षा बल’च्या (सीआयएसएफ) महिला कॉन्स्टेबलने कथितरीत्या कंगनाच्या श्रीमुखात भडकावली.
माझ्या चेहऱ्यावर चापट मारत मला शिवीगाळ करण्यात आली. सध्या मी सुरक्षित आहे, पण पंजाबमधील दहशतवादाविषयी चिंतीत आहे,अशी प्रतिक्रिया कंगनाने दिली. हिमाचल प्रदेशातील मंडी लोकसभा मतदारसंघातून ७४ हजार मतांनी विजयी झालेल्या भाजपच्या नवनिर्वाचित खासदार कंगना राणावतला चंदिगड विमानतळावर तपासणी करीत असताना कर्टन रूममध्ये सीआयएसएफची महिला कॉन्स्टेबल कुलविंदर कौरने कंगनाच्या श्रीमुखात लगावली.
यावेळी कंगनासोबत असलेल्या सहप्रवाशाने पलटवार करण्याचा प्रयत्न केला. तोपर्यंत कुलविंदर कौरला ताब्यात घेण्यात आले होते. कर्टन रूममध्ये कुलविंदरने आपल्यासोबत वाद घातल्याचा आरोप कंगना राणावतने केला आहे. आपण शेतकरी आंदोलनाचे समर्थक असल्याचे मारहाण करणाऱ्या सीआयएसएफ महिला कॉन्स्टेबल कुलविंदर कौरने सांगितल्याचे कंगना म्हणाली. या घटनेवरून कंगनाने पोलिसांकडे तक्रार केली. त्यानंतर महिला कॉन्स्टेबलविरोधात गुन्हा दाखल करीत तिला निलंबित करण्यात आले, अशी माहिती अधिकाऱ्यांनी दिली.