लातूर (वृत्तसंस्था) वाणिज्य प्रयोजनार्थ जमीन विकासाची प्राथमिक परवानगी मिळाली; परंतु अंतिम परवानगीसाठी दाखल केलेल्या प्रकरणातील प्रलंबित कामासाठी सात लाख रुपयांची मागणी करून तडजोडीअंती पाच लाख रुपयांची लाच पंचांसमक्ष स्वीकारताना अहमदपूर नगर परिषदेचे मुख्याधिकारी काकासाहेब डोईफोडे व नगर परिषदेचे नगररचनाकार अजय कस्तुरे यांना लाचलुचपत प्रतिबंधक विभागाच्या पथकाने बुधवारी (दि.१४) तक्रारदाराच्या कारमध्येच रंगेहाथ पकडल्याची घटना अहमदपूर येथे घडली.
तालुक्यातील मरशिवणी येथील सव्हें नंबर ५६ मध्ये ३ हजार ६०० चौरस मीटर क्षेत्राला व्यवसाय करण्यासाठीची प्राथमिक मान्यता मिळाली आहे. त्याच्या अंतिम परवानगीसाठी अहमदपूर नगर परिषदेकडे तक्रारदाराने रितसर ऑनलाइन चलनाचा भरणा केला होता. परंतु त्याचे काम होत नव्हते. यामुळे तक्रारदाराचे व्यावसायिक नुकसान होत होते. हे टाळण्यासाठी ५ फेब्रुवारी रोजी तक्रारदार अहमदपूर नगर परिषदेत गेला होता. त्या वेळी येथील नगररचनाकार अजय विजयकुमार कस्तुरे याने त्याच्यासह नगर परिषदेचे मुख्याधिकारी काकासाहेब सिध्देश्वर डोईफोडे यांच्यासाठी ७ लाख रुपयांच्या लाचेची मागणी केली. तडजोडीअंती ५ लाख रुपये देण्याचे ठरले होते. त्यानुसार बुधवारी (दि.१४) तक्रारदार हा नगर परिषद परिसरात गेला असता त्याच्याच कारमध्ये नगररचनाकार अजय कस्तुरे याने पाच लाख रुपयांची लाच स्वीकारली.
तक्रारदाराने अधिकाऱ्यांनी प्रलंबित कामासाठी लाच मागितल्याने लातूरच्या लाचलुचपत प्रतिबंधक विभागाला याची कल्पना देऊन ठेवली होती. त्यानुसार लाचलुचपत प्रतिबंधक विभागाचे उपअधीक्षक पंडित रेजितवाड यांच्या नेतृत्वातील पथकाने सापळा रचला होता. आरोपी अजय कस्तुरे याने लाच स्वीकारताच दबा धरून बसलेल्या अधिकाऱ्यांनी अजय कस्तुरे याला रंगेहाथ पकडले. कस्तुरे याने ही लाच स्वतःसह नगर परिषदेचे मुख्याधिकारी काकासाहेब डोईफोडे यांच्यासाठीही स्वीकारल्याचे समोर आले आहे.
