जळगाव (शहबाज देशपांडे) : जिल्ह्यातील शहरी आणि ग्रामीण भागातील सर्व नागरिकांनी निवडणूक आयोगाच्या ‘SIR’ (Systematic Identification and Registration) मॅपिंग प्रक्रियेत सहभाग नोंदवून ही प्रक्रिया तातडीने पूर्ण करावी, असे विनम्र आवाहन जिल्ह्याचे पालकमंत्री ना. गुलाबराव पाटील यांनी केले आहे. भविष्यातील संभाव्य तांत्रिक अडचणी टाळण्यासाठी ही प्रक्रिया अत्यंत महत्त्वाची असल्याचे त्यांनी नमूद केले.
मॅपिंग प्रक्रिया नक्की काय आहे?
नागरिकांनी आपल्या स्वतःच्या नावाची किंवा कुटुंबातील सदस्यांच्या नावाची २००२ मधील मतदार यादीशी सांगड (मॅपिंग) घालणे आवश्यक आहे. ही प्रक्रिया पूर्ण करण्यासाठी खालील टप्प्यांचे पालन करावे:
ECINET ॲपचा वापर: सर्वप्रथम ‘ECINET’ हे अधिकृत ॲप डाऊनलोड करून त्यामध्ये २००२ च्या मतदार यादीतील आपले नाव शोधावे.
तपशील संकलन: २००२ मधील आपला मतदारसंघ क्रमांक (AC Number & Name), मतदान केंद्र क्रमांक (Polling Station No. & Name) आणि अनुक्रमांक (Part Serial No.) यांचा शोध घ्यावा.
BLO कडे माहिती सादर करणे: वरील सर्व तपशील आपल्या संबंधित मतदान केंद्राच्या BLO (Booth Level Officer) कडे देऊन आपली मॅपिंग प्रक्रिया पूर्ण करून घ्यावी.
स्वतःचे नाव नसल्यास काय करावे?
जर एखाद्या नागरिकाचे नाव २००२ च्या मतदार यादीत नसेल, तर त्यांनी आपल्या आई-वडील किंवा आजी-आजोबांचे नाव ‘ECINET’ ॲपद्वारे शोधावे. त्यांचा २००२ मधील मतदारसंघ, मतदान केंद्र आणि अनुक्रमांक हा तपशील गोळा करून तो BLO कडे जमा करावा, जेणेकरून कुटुंबाचे मॅपिंग सुलभ होईल.
