मुंबई (प्रतिनिधी) भोसरी येथील भूखंड घोटाळा प्रकरणी माजी मंत्री एकनाथराव खडसे यांच्या अडचणी वाढल्या आहेत. खडसेंच्या पत्नी मंदाताई खडसे यांचा अटकपुर्व जामीन अर्ज मुंबई सेशन कोर्टाने फेटाळला आहे, असे टि्वट सामाजिक कार्यकर्त्या अंजली दमानिया यांनी केले आहे. दरम्यान, या प्रकरणी आता मंदाताई खडसेंच्या विरोधात अटक वॉरंट बजावण्यात आल्याने खळबळ उडाली आहे.
एकनाथराव खडसे हे महसूल मंत्री असताना भोसरी येथील वादग्रस्त भूखंड त्यांच्या पत्नी मंदाताई खडसे आणि जावई गिरीश दयाराम चौधरी यांनी खरेदी केल्याचे प्रकरण खूप गाजले होते. एकनाथराव खडसे यांना या प्रकरणी मंत्रिपदाचा राजीनामा द्यावा लागला होता तर ईडीने सुद्धा या प्रकरणाची चौकशी सुरू केली आहे. या संदर्भात खुद्द एकनाथराव खडसे, मंदाताई खडसे आणि गिरीश दयाराम चौधरी यांच्या विरोधात आरोपपत्र दाखल करण्यात आलेले आहे. यापैकी गिरीश चौधरी हे सुमारे सव्वा तीन महिन्यांपासून कारागृहात आहेत. एकनाथराव खडसे यांची ईडीने आधी चौकशी केलेली असली तरी मंदाताई खडसे मात्र अद्यापपर्यंत इडीसमोर हजर झालेल्या नव्हत्या. त्यांनी आपण आजारी असल्याचे पहिल्यांदा कारण सांगितले होते तर दुसऱ्यांदा त्यांनी मुदत वाढवून मागितली होती. दरम्यान, सतत गैरहजर राहत असल्यामुळे आज मुंबई येथील सेशन कोर्टाने त्यांच्या विरोधात अटक वॉरंट बजावले आहे.
मंदाताई खडसे यांनी याप्रकरणी आपल्याला अटकपूर्व जामीन मिळावा म्हणून मुंबई सत्र न्यायालयामध्ये अर्ज केला होता. त्यावर आज सुनावणी झाली असता त्यांचा अर्ज फेटाळण्यात आला असून त्यांच्याविरोधात अटक वॉरंट जारी करण्यात आल्याचे या वृत्तामध्ये म्हटले आहे.
दरम्यान, मंदाताई विरुद्ध अटक वॉरंट जारी झाला असतांना एकनाथ खडसे यांना मात्र वैद्यकीय कारणामुळे न्यायालयाने दिलासा दिला आहे. मुंबई सेशन कोर्टाने या प्रकरणाची सुनावणी आता २१ ऑक्टोंबर रोजी ठेवली आहे.
