भुसावळ (प्रतिनिधी) येथील पालिकेचे मुख्याधिकारी संदीप चिद्रवार हे शहरातील टिंबर मार्केटमधील सर्व्हे २०६ वरील अवैध बांधकामाची पाहणी करण्यासाठी गेले असता राष्ट्रवादी काँग्रेसचे माजी आ. संतोष चौधरी यांनी शिवीगाळ व शासकीय कामात अडथळा आणला, याप्रकरणी गुन्हा दाखल करण्यात आला आहे.
याबाबत अधिक माहिती अशी की, शहरातील टिंबर मार्केटमधील सर्व्हे २०६ वरील अवैध बांधकामाची जिल्हाधिकाऱ्यांकडे तक्रार करण्यात आली होती व या संदर्भात शहानिशा करण्याबाबत भुसावळ मुख्याधिकाऱ्यांना सोमवारी पत्र देण्यात आले. त्यानंतर मुख्याधिकारी चिद्रवार व पालिकेचे कर्मचारी टिंबर मार्केटमधील सर्व्हे २०६ वरील सर्वोदय छात्रालयाच्या गेल्यानंतर तिथे माजी आमदार संतोष चौधरी यांनी येत मुख्याधिकारी यांच्याशी वाद घातला. त्यांना अर्वाच्च भाषेत शिवीगाळ केली, सरकारी कामात अडथळा आणला, असा आरोप आहे. याप्रकरणी मुख्याधिकारी संदीप चिद्रवार यांनी दिलेल्या फिर्यादीवरून संतोष चौधरी यांच्याविरुध्द रात्री उशिरा गुन्हा दाखल करण्यात आला. यामुळे राजकीय गोटात मोठी खळबळ माजली आहे.
