धरणगाव (प्रतिनिधी) शहरातील पारधी वाड्यातील अवैध दारूविक्रेत्यांविरुद्ध अखेर गुन्हा दाखल करण्यात आला आहे. नागरिकांच्या मागणीनंतर धरणगाव पोलिसांनी पारधी वाडा भागातील अवैध दारु विक्री करणाऱ्यांच्या घरी छापे मारत धडक कारवाई करून तिघांविरुद्ध गुन्हा दाखल केलाय. तर दुसरीकडे बेकायदा रास्ता रोको करणाऱ्याविरुद्ध देखील कोरोनाच्या नियमांचे उल्लंघन केल्याप्रकरणी कारवाई करण्यात आली आहे.
यासंदर्भात अधिक असे की, दि. ०१ ऑक्टोबर २०२१ रोजी मध्यरात्रीच्या सुमारास पारधी वाडा, धरणगाव भागातील काही महीला व पुरुष पोलीस स्टेशनला त्यांच्या आपसातील भांडणाची तक्रार देण्यासाठी आले होते. पोलीस ठाणे अंमलदार यांनी एका बाजूची तक्रार घेण्यास सुरुवात केली असतानाच समोरी लोकांनी गैर कायद्याची मंडळी जमवत बस स्टैंड समोर रोडवर बसून रास्ता रोको करून अवैध दारु बंद करणेबाबत घोषणेबाजी केली. सदर घटनेची माहीती मिळताच पोलीस घटनास्थळी पोहचले. त्यावेळी रोडवर बसलेल्या लोकांना समजविले तरी त्यांनी काही वेळपर्यंत रस्ता रोको केला. त्यानंतर आंदोलन करणाऱ्या जमावाची तक्रार ऐकून घेवून त्यांना कारवाईचे आश्वासन देण्यात आले होते.
दरम्यान, या आंदोलनाची दखल घेऊन पारधी वाडा भागातील दारु विक्री करणाऱ्यांच्या घरी छापे मारण्यात आले. यात या पथकाने पारधी वाडा भागात अवैधरीत्या दारु कब्जात बाळगुन तिचे चोरटी विक्री करणारे १) रिना भगवान पवार, २) रत्नाबाई नाना पारधी, ३) राजेंद्र सुकलाल मराठे अशांवर दारुबंदी अधिनियमाअंतर्गत छापे टाकुन कारवाई करण्यात आली.
यासोबत गैरकायद्याची मंडळी जमवून त्यांना चिथावणी देवून कायदा हातात घेवून रास्ता रोको करणाऱ्या ७ लोक व इतर १५ ते २० अज्ञात लोकांविरुध्द देखील धरणगाव पोलीस स्टेशनला कायदेशीर गुन्हा दाखल करण्यात आला आहे. जळगाव जिल्हाधिकारी यांचे कडील जमावबंदीचे आदेश लागू आहेत. तसेच कोविड-१९ विषाणुचा प्रदुर्भाव रोखण्यासाठी प्रतिबंधात्मक आदेश जारी करण्यात आले आहेत. आपली काही तक्रार असल्यास आपण कायदा हातात न घेता सनदशीर मार्गाने मांडावी, तसेच कोणत्याही अवैध धंद्याबाबत आमच्याशी संपर्क केल्यास त्याची दखल घेण्यात येईल. गैरकायदेशीर कृत्य केल्यास यापुढे देखील त्यांचे विरुध्द प्रचलित कायद्यान्वये दखलपात्र स्वरूपाची कार्यवाही करण्यात येईल, असे धरणगाव पोलीस स्टेशनतर्फे आवाहन करण्यात आले आहे.
