चोपडा (प्रतिनिधी) तलवारीने केक कापून रस्त्यावर वाढदिवसाचा जल्लाेष करणे आठ जणांना चांगलेच महागात पडलेय. चोपडा पोलिसांनी कायद्यासह दंडुका दाखवित आरोपींविरुद्ध गुन्हा दाखल करून सात जणांना अटक केली आहे.
पोहेकॉ निलेश सोनवणे यांच्या फिर्यादीवरून शहरातील शेतपुरा भागातील रहिवासी सय्यद फैजल अली मझहर अली, रॉयल एजन्सी समोर मास्टर कॉलनी मधील रहिवासी शाकीर सय्यद साबीर अली, दानिश सय्यद साबीर अली, शेतपुरा भागातील रहिवासी रिजवान अली अयाज अली, मास्टर कॉलनीमधील रहिवासी दानिश शेख हमीद शेख, के.जी.एन कॉलनी मधील रहिवासी बाबू लोहार निजाम लोहार, चुनार अळी जबरे राम मंदिर परिसरातील रहिवासी साजिद शेख गफ्फार आणि फकीरवाडा मधील रहिवासी शोएबशाह जाकीर शाह या आठ संशयित आरोपी विरोधात चोपडा शहर पोलीस स्टेशन मध्ये भारतीय हत्यार कायदा कलम 4/25 सह (37) (1) (3) चे उल्लंघन 135, भादवी कलम 34 प्रमाणे गुन्हा दाखल करण्यात आलेला आहे.
गुन्ह्यात वापरलेली 2 हजार रुपये किमतीची एका बाजूला धारदार, टोकदार लोखंडी पाते असलेली 28 इंच लांब अशी तलवार व 1.5 इंच रुंद व त्यास पितळी धातूची सहा इंचाची मूठ असलेली तलवार (आतील भाग काळा रंगाचा त्यावर सोनेरी रंगाचा दोरा गुंडाळलेली) शोएब शाह जाकीर शाह (रा. फकीरवाडा) याच्या घरात आढळून आली. तर संशयित आठ आरोपींविरुद्ध चोपडा शहर पोलीस स्टेशनमध्ये गुन्हा दाखल झाला असून सात संशयितांना अटक केली आहे. पुढील तपास पोलीस निरीक्षक के.के. पाटील यांच्या मार्गदर्शनाखाली पोलीस नाईक संदीप भोई हे करीत आहेत.
