बापरे ! पुण्यात ९ बँकांची तब्बल एक कोटींची फसवणूक !

पुणे (वृत्तसंस्था) पुण्यातील (Pune) एका व्यक्तीने आपल्या काही साथीदारांच्या मदतीने वाहनांसाठी कर्ज घेण्याच्या नावाखाली ९ बँकांना एक कोटी रुपयांचा गंडा (fraud with 9 banks) घातला आहे. दरम्यान संशयित आरोपीने बँकांना गंडा घालण्यासाठी वापरलेला फंडा ऐकून पोलिसही चक्रावले होते.

या प्रकरणी एका बँकेनं आरोपीविरोधात पोलिसांत फिर्याद दाखल केल्यानंतर हा फसवणुकीचा प्रकार उघडकीस आला आहे. या प्रकरणी पुण्यातील दत्तवाडी पोलीस ठाण्यात गुन्हा दाखल केला असून आरोपी विक्रम इंगळे याला अटक केली आहे.

आरटीओ आणि विम्याची बनावट कागदपत्रे

पोलिसांनी दिलेल्या माहितीनुसार, आरोपी विक्रम इंगळे यानं बनावट शोरूमच्या नावाने बनावट आरटीओ आणि विम्याची कागदपत्रे तयार करून घेतली होती. हीच कागदपत्रं जमा करून आरोपी बँकेतून कर्ज घेत होता. आरोपी इंगळे यानं अशाच प्रकारे ९ बँकांची मिळून एकूण १.२३ कोटी रुपयांची फसवणूक केली आहे. यात आंतरराज्य टोळीचा हात असल्याचा संशय गुन्हे शाखेला आहे. पोलीस आरोपीचा कसून तपास करत आहेत.

‘या’ ९ बँकांची झाली फसवणूक

शामराव विठ्ठल सहकारी बँक, जनकल्याण नागरी सहकारी पतसंस्था, सारस्वत अर्बन को-ऑपरेटिव्ह बँक, संत सपोनकाका सहकारी बँक, धायरेश्‍वर नागरी सहकारी पतसंस्था, श्री शास्त्रार्जुन नागरी सहकारी पतसंस्था, धन्वंतरी नागरी सहकारी पतसंस्था, गुरूदेव नागरी सहकारी आणि यंत्र निर्माण नागरी सहकारी पतसंस्था असं फसवणूक झालेल्या सहकारी बँकांची नावं आहे.

आरोपीने ‘असा’ घातला गंडा

इंगळे विरोधात फिर्याद दाखल करणाऱ्या बँकेच्या मते, आरोपी इंगळे आणि इतर आरोपींनी जून २०१९ मध्ये महिंद्रा XUV-500 साठी वाहन कर्जासाठी अर्ज केला होता. त्यासाठी त्यांनी सह्याद्री मोटर्सने दिलेलं कोटेशन आणि नोंदणी क्रमांक, चलन व विमा कागदासह अनेक कागदपत्रे सादर केली होती. त्यामुळे त्याला कर्ज मंजूर झाले. कर्ज मिळाल्यानंतर आरोपीनं बँकेतील रक्कम काढून घेतली. पण त्याची परतफेड केली नाही. यानंतर बँकेकडून कॉल किंवा ई-मेल पाठवले असता, आरोपीनं यालाही प्रतिसाद दिला नाही.

या प्रकारानंतर बँकेनं या प्रकरणाची चौकशी केली. तसेच कागदपत्रांची पडताळणी केली असता, जमा केलेले सर्व कागदपत्रे बनावट असल्याचं स्पष्ट झालं आहे. तसेच त्यानं ज्या वाहनासाठी कर्ज घेतलं होतं अशी गाडी अस्तित्वातच नसल्याचं समोर आलं आहे. यानंतर बँकेनं दत्तवाडी पोलीस ठाण्यात आरोपी विरोधात गुन्हा दाखल केला आहे. या घटनेचा पुढील तपास पोलीस करत आहेत. दरम्यान, न्यायालयाने त्याचा जामीन अर्ज फेटाळून लावला आहे.