पुणे (वृत्तसंस्था) ४८ वर्षांच्या एका पुणेकराला दोन जणांनी २१.६६ लाख रुपयांना गंडा घातल्याची घटना उघडकीस आली आहे. बनावट फॉरेक्स ट्रेडिंग कंपनीच्या नावाखाली या व्यक्तीची फसवणूक झाली आहे.
थेरगावमध्ये राहणाऱ्या 48 वर्षांच्या एका व्यक्तीची इंटरनेटवरून दोघांनी फसवणूक केली आहे. जुलै 2021मध्ये दोघा घोटाळेबहाद्दरांनी ट्रेडशॉटएफएक्स नावाच्या अस्तित्वात नसलेल्या फॉरेक्स ट्रेडिंग कंपनीत गुंतवणूक करण्यास आकर्षित केलं. त्या कंपनीत गुंतवणूक केलेल्या अन्य गुंतवणूकदारांना कसा चांगला परतावा मिळाला, याची माहिती देणारे काही स्क्रीनशॉट्स त्या दोघांनी या व्यक्तीला फॉरवर्ड केले.
त्यानंतर संबंधित व्यक्तीने त्यांच्या वेबसाइटला भेट दिली. त्यावरही त्या व्यक्तीला तशीच माहिती सापडली. गुंतवणूकदारांना झालेल्या नफ्याबद्दलची माहिती तिथेही पाहायला मिळाल्यावर संबंधित व्यक्ती त्या दाव्याला बळी पडली. त्या व्यक्तीने संबंधित कंपनीत ऑनलाइन अकाउंट उघडलं. आपली केवायसी डॉक्युमेंट्स अपलोड केली आणि त्या कंपनीत गुंतवणूक करायला सुरुवातही केली. संबंधित घोटाळेबाजांनी त्या व्यक्तीला चुकीची माहिती दिली आणि त्या व्यक्तीला गुंतवणुकीवर चांगला परतावा मिळत असल्याचं सांगितलं.
पोलिसांनी दिलेल्या माहितीनुसार, त्या व्यक्तीने बँक खातं, तसंच यूपीआयद्वारे तब्बल 21.66 लाख रुपये त्या व्यक्तींना ट्रान्स्फर केले. तरीही त्या व्यक्तीला खात्रीशीर सांगण्यात आलेला परतावा मिळालाच नाही. अखेर त्या व्यक्तीने सोमवारी (2 मे) वाकड पोलिस ठाण्यात तक्रार दाखल केली. घोटाळेबाजांनी हितेश आणि संजय अशी आपली नावं सांगितली होती. त्या व्यक्तींविरोधात पोलिसांनी माहिती-तंत्रज्ञान कायद्याची कलमं, तसंच भारतीय दंडविधान कलम 406 आणि 420 अंतर्गत गुन्हा दाखल केला आहे.
