पुणे (वृत्तसंस्था) मदनवाडी ता. इंदापूर येथील वन विभागाच्या जमिनीमध्ये शिवीगाळ केल्याचा मनात राग धरून मित्राचा दगडाने ठेचून निघृणपणे खून केल्याची घटना उघडकीस आली आहे. यामुळे भिगवण परिसरात या घटनेने खळबळ उडाली आहे.
विजयकुमार विठ्ठलराव काजळे (वय ४५, मूळ रा. निरगुडे, ता. इंदापूर, हल्ली रा. मदनवाडी, ता. इंदापूर) असे खून झालेल्या तरुणाचे नाव आहे. ही घटना माध्यमिक विद्यालयासमोरील रस्त्यावरच घडल्यामुळे येथील परिसर भीतीच्या छायेखाली आहे. याप्रकरणी भिगवण पोलिसांनी राज भगवान शिंदे (रा. बंडगर वस्ती, मदनवाडी, ता. इंदापूर) या आरोपीला काही तासांतच अटक केली.
मृताची पत्नी भाग्यश्री काजळे यांनी दिलेल्या फिर्यादीनुसार शिंदे याच्यावर खुनाचा गुन्हा दाखल करण्यात आला आहे. पोलिसांनी दिलेल्या माहितीनुसार, विजय काजळे व राज शिंदे हे मित्र होते. त्यांनी सोमवारी रात्रीच्या वेळी गप्पा मारल्यानंतर काही कारणावरून त्यांच्यामध्ये वादावादी झाली. शिवीगाळ केल्याचा राग आल्याने आरोपी शिंदे याने काजळे याचा दगडाने ठेचून खून केल्याची पोलिसांना कबुली दिली. ही घटना रात्री एकच्या सुमारास घडली. सकाळी हा प्रकार नागरिकांच्या लक्षात आला.
घटनेची माहिती समजताच भिगवण पोलीस ठाण्याचे सहायक पोलीस निरीक्षक विनोद महांगडे, पोलीस उपनिरीक्षक प्रवीण जर्दै, पोलीस उपनिरीक्षक अमित पाटील यांनी घटनास्थळी धाव घेतली व सदर घटनेचा पंचनामा केला व तपासाच्या दृष्टीने महत्त्वाचे धागेदोरे शोधण्यासाठी परिसरातील सीसीटीव्हीचे फुटेज तपासून तांत्रिक विश्लेषणाच्या सहाय्याने शोध घेण्याचा प्रयत्न केला. आरोपीच्या चार-पाच तासांच्या आतच मुसक्या आवळण्यात भिगवण पोलिसांना यश मिळाले.
