चाळीसगाव (प्रतिनिधी) चाळीसगाव शहर पोलीस ठाण्यात पोलीस निरीक्षकाच्या वाढदिवसानिमित्त कर्मचाऱ्यांची चक्क डान्स पार्टी झाल्याचे पाहायला मिळाले. अधिकारांना खांद्यावर बसवत कर्मचाऱ्यांनी जल्लोषात हिंदी चित्रपट गीतावर डान्स केला. यावेळी हे पोलीस स्टेशन आहे की एखाद्या ठिकाणच्या लग्नातील हळदीचा कार्यक्रम असाही प्रश्न अनेकांना पडला. दरम्यान अधिकाऱ्याच्या वाढदिवसाच्या डान्स पार्टीचा हा व्हिडीओ सोशल मीडियावर व्हायरल झाला आहे.
नारदाच्या गादीवर पाय ठेवल्याप्रकरणी जळगाव जिल्ह्यातील चाळीसगाव शहराचे पोलीस निरीक्षक के के पाटील हे चांगलेच वादाच्या भोवऱ्यात सापडले होते. हे प्रकरण कुठे थांबत असताना के. के. पाटील हे पुन्हा वादाच्या भोवऱ्यात सापडण्याची चिन्हे दिसू लागले आहेत. पोलिस सूत्रांकडून मिळालेल्या माहितीनुसार, काल चाळीसगाव पोलिस ठाण्यातील पोलिस कर्मचारी आणि पोलीस निरीक्षक के. के. पाटील यांचा वाढदिवस होता. या वाढदिवसाच्या निमित्ताने पोलिस ठाणे परिसरात केक कापण्यासह गाण्याच्या तालावर पोलीस निरीक्षक के के पाटील यांच्यासह काही कर्मचारीही नाचताना बघायला मिळाल्याने चांगलीच खळबळ उडाली आहे.
पोलिस निरीक्षक आणि पोलिस कर्मचारी नाचण्याची क्लिप सोशल मीडियावर वायरल झाल्याने चर्चेला उधाण आले असून जनतेमधून मात्र उलट सुलट चर्चा होताना दिसून येत आहेत. या प्रकरणावर आता वरिष्ठ पोलीस अधिकारी काय पाऊल उचलतात हे बघणे महत्वाचे ठरणार आहे.
