जळगाव (प्रतिनिधी) शहरातील गजानन कॉलनीत अज्ञात चोरट्याने भरदिवसा धाडसी चोरी केली आहे. देवघरात घुसून लक्ष्मी पुजानाचे वेळी ठेवलेले तब्बल १२ ते १३ लाखांचे १४ तोळे सोने-चांदीचे दागिने अज्ञात चोरट्याने लंपास केल्यामुळे पोलिसांचा धाक संपलाय का?, असा प्रश्न उपस्थित होत आहे.
शुक्रवारी रात्री अॅड. प्रतापराव निकम यांनी सहपरिवार लक्ष्मी पूजन करण्यासाठी घरातील सोने-चांदीचे दागिने देवघरात ठेवले होते. यानंतर शनिवारी सकाळी ते नेहमी प्रमाणे घरा खालील मंदिरात दर्शन घेण्यासाठी गेले. मुलगा खोलीत झोपलेला तर पत्नी घर कामात व्यस्थ होत्या. याच वेळी अज्ञात चोरट्याने घराचा दरवाजा तसेच वॉल कंपाउंडचे गेट उघडे असल्याचा फायदा घेत अवघ्या काही मिनिटात १२ ते १३ लाखांचे १४ तोळे दागिने घेत घरातून पळ काढण्याचा प्रयत्न केला. अॅड. प्रतापराव निकम याचवेळी नेमके घरात शिरले आणि त्यांनी चोरट्याला रोखण्याचा प्रयत्न केला. यावेळी दोघांमध्ये काही वेळ झटापटही झाली होती. परंतु चोरटा पळ काढण्यात यशस्वी ठरला.
चोरट्याने ६ तोळयाचे सोन्याचे ४ बांगडया, ३.५ तोळे वजनाचे लांब मंगळसुत्र, २ तोळे वजनाचे ६ अंगठया १ तोळे वजनाचे दोन मनगटया, दोन पाटल्या, एक जोड कानातले, ३ ग्रॅम वजनाचा १० हजार रुपये किंमतीची सोन्याचा तुकडा, ५ ग्रॅम चांदीचे जोडवे २० ग्रॅम वजनाचे चांदीचे पायातले पैंजण २ जोडी, असा ऐवज चोरट्याने लंपास केला आहे. दरम्यान, चोरटा सीसीटीव्हीत कैद झाला असून पोलिसांसमोर गुन्ह्याची उकल करण्याचे मोठे आव्हान आहे.
