एरंडोल (प्रतिनिधी) मित्रांसोबत पायी जात असतांना पाय घसरुन खदानीत पडलेल्या रोहीत विकास पठाण (वय-५, रा. सावदे ता. एरंडोल) या चिमुकल्याचा बुडून दुर्देवी मृत्यू झाला. ही घटना सोमवारी दुपारी दीड वाजेच्या सुमारास एरंडोल तालुक्यातील सावदे गावात घडली.
नेमकं काय घडलं !
एरंडोल तालुक्यातील सावदे गावात विकास सुपडू पठाण हे आपल्या पत्नी मोनी व पाच वर्षाचा मुलगा रोहितसह वास्तव्याला आहे. नेहमीप्रमाणे सोमवारी सकाळीच पठाण दाम्पत्य हे शेताच्या कामाला निघून गेले होते. त्यावेळी रोहित हा घरी एकटाच होता. दरम्यान. दुपारी दीड वाजेच्या सुमारास गावातील काही लहान मुलांसोबत रोहित गावानजीक असलेल्या खदानीजवळ खेळण्यासाठी गेला होता. त्यावेळी खेळत असतांना त्याचा पाय घसरल्याने तो खदानीच्या पाण्यात पडला. ही घटना घडल्यानंतर सोबत असलेल्या मुलांनी गावात धाव घेत घटनेची माहिती गावकऱ्यांना दिली.
ग्रामस्थांसह पट्टीच्या पोहणाऱ्यांनी काढले बाहेर !
घटनेची माहिती मिळाल्यानंतर ग्रामस्थांनी घटनास्थळी धाव घेतली. तसेच पट्टीच्या पोहणाऱ्यांनी खदानीतून रोहीतचा मृतदेह बाहेर काढीत त्याला तात्काळ जिल्हा शासकीय वैद्यकीय महाविद्यालयात दाखल केले. याठिकाणी वैद्यकीय अधिकारी यांनी त्याची तपासणी करीत मयत घोषित केलं. रोहीत हा पठाण दाम्पत्याचा एकुलता एक मुलगा होता. यामुळे पठाण कुटुंबियांवर दुःखाचा डोंगर कोसळला असून गावात देखील शोककळा पसरली आहे. एकुलत्या एक मुलाचा दुर्देवी मृत्यू झाल्याने पठाण परिवाराचा आक्रोश काळीज चिरणारा केला.
