नागपूर (वृत्तसंस्था) मेळघाट व्याघ्र प्रकल्पातील वनपरिक्षेत्र महिला अधिकारी दिपाली चव्हाण यांनी स्वतःवर गोळी झाडून आत्महत्या केली होती. उप वन संरक्षक विनोद शिवकुमार यांच्या जाचाला कंटाळून त्यांनी आत्महत्या केल्याची माहिती आता समोर आली आहे. यात उप वनसंरक्षक विनोद शिवकुमार यांच्यावर गंभीर आरोप करण्यात आले आहेत. त्यानंतर अखेर पोलिसांनी विनोद शिवकुमार याला नागपूर रेल्वे स्टेशनवरून अटक केली आहे.
माझ्या आत्महत्येला सर्वस्वी जबाबदार हे गुगामल वन्यजीव विभागाचे उपवनसंरक्षक विनोद शिवकुमार हेच असतील, त्यांच्यावर कारवाई करा. माझ्यासोबत जे झाले ते इतरांसोबत होऊ नये असे आत्महत्या केलेल्या वनपरिक्षेत्र अधिकारी दीपाली चव्हाण यांनी आत्महत्त्येपूर्वी केलेल्या सुसाईड नोटमध्ये लिहलं आहे. पवनसंराक्षक विनोद शिवकुमार यांनी दिलेल्या त्रासामुळे आत्महत्या करत असल्याचे दिपाली चव्हाण यांनी आत्महत्या करण्यापुर्वी केलेल्या तक्रारी अर्जात म्हंटले आहे. हा तक्रारी अर्ज रेड्डी, अपर प्र.भु.व. संरक्षक क्षेत्र संचालक मेळघाट व्याग्र प्रकल्प अमरावती यांच्या नावे केला आहे. दीपाली चव्हाण यांनी लिहलेल्या चार पानांच्या या पत्रात त्यांनी आपण का आत्महत्या करत आहोत याचा खुलासा केला आहे.
दीपाली चव्हाण यांच्या आत्महत्या प्रकरणात विनोद शिवकुमार यांना आज नागपुरातून अमरावती पोलिसांच्या पथकाने ताब्यात घेतले आहे. शिवकुमार हे रेल्वेद्वारे प्रवास करत असल्याची माहिती मिळाली होती, पहाटेच्या सुमारास ते नागपूर रेल्वे स्थानकातून जाणार आहेत अशी माहिती मिळाल्यानंतर अमरावती एलसीबी पथकाने नागपूर जीआरपीच्या कर्मचाऱ्यांसोबत मिळून शिवकुमार यांना ताब्यात घेतले. अमरावती पोलीस लगेच शिवकुमार यांना घेऊन अमरावतीच्या दिशेने निघाले आहे.
दरम्यान, विनोद शिवकुमार यांच्या जाचाला कंटाळून दिपाली चव्हाण यांनी आत्महत्या केल्याची धक्कादायक माहिती आता समोर आली होती. तर वेळोवेळी शिवकुमार यांनी जाच केल्याचा आरोप दिपाली चव्हाण यांनी शिवकुमार यांच्यावर केला होता. या प्रकरणात पोलीस अधिक तपास करत आहेत.
