धरणगाव (प्रतिनिधी) शहरातील बडगुजर गल्लीत पाईप लाईनसाठी काही दिवसापासून खोदून ठेवलेल्या रस्त्याने एका गरीब नागरिकाचा बळी घेल्याची हृदयद्रावक घटना आज पहाटे घडली. संतापजनक म्हणजे याबाबत ठेकेदाराच्या इंजिनिअरला फोन केला असता, त्याने खड्ड्यामुळे नव्हे तर चक्कर येऊन पडल्यामुळे मृत्यू झाल्याचे सांगत उर्मटपणा केला. दरम्यान, संबधित ठेकेदाराविरुद्ध सदोष मनुष्यवधाचा गुन्हा दाखल करण्याची मागणी नातेवाईकांसह समाज बांधवांनी केली आहे.
धरणगाव शहरातील मोठा माळी वाडा लगत असलेल्या बडगुजर गल्लीत मागील तीन-चार दिवसापासून पाण्याच्या पाईप लाईनसाठी रस्ता खोदून ठेवलेला आहे. आज पहाटे साडेपाच ते सहा वाजेच्या दरम्यान संजय रतन बडगुजर (वय-52) हे नेहमी प्रमाणे शौचास जाण्यासाठी घरातून निघाले. खोदून ठेवलेल्या रस्त्यामुळे आजूबाजूला असलेल्या दगडावरून बडगुजर यांचा पाय घसरला आणि थेट खड्ड्यात जाऊन पडले. डोक्याला जबर मार लागल्यामुळे त्यांचा जागीच मृत्यू झाला.
घटनेची माहिती मिळताच माजी लोकनियुक्त नगराध्यक्ष निलेश चौधरी यांनी ठेकेदारला जाब विचारण्यासाठी फोन लावला असता त्यांनी फोन उचलला नाही. त्यानंतर चौधरी यांनी ठेकेदाराच्या इंजिनिअरला फोन लावला असता त्याने खड्ड्यामुळे नव्हे तर चक्कर येऊन पडल्यामुळे मृत्यू झाल्याचे उर्मट भाषेत उत्तर दिले. दरम्यान, संजय बडगुजर यांच्या कुटुंबाची आर्थिकस्थिती हलाकीची आहे. रांगोळी विकून आणि जे मिळेल ते काम करून ते आपल्या परिवाराचा उदरनिर्वाह करत होते. त्यामुळे त्यांच्या परिवाराला आर्थिक मदत मिळावी, अशी मागणी होत आहे. काही दिवसांपूर्वी देखील खोदलेल्या रस्त्यांमुळे नागरिक कशा पद्धतीने दुचाकी घसरून पडताय, याचे व्हिडीओ धरणगावच्या सोशल मीडियात व्हायरल झाले होते.
संबंधित परिवार अत्यंत गरीब आहे. घरातील कर्ता व्यक्ती निघून गेल्यामुळे परिवारावर मोठा आघात झाला आहे. त्यांना आर्थिक मदत मिळाली पाहिजे किंवा ठेकेदाराविरुद्ध सदोष मनुष्यवधाचा गुन्हा दाखल झाला पाहिजे.
– वासुदेव बडगुजर (बडगुजर समाज अध्यक्ष, धरणगाव)
मी ठेकेदारला फोन केला होता. परंतू त्यांनी फोन उचलला नाही. त्यामुळे मी ठेकेदाराच्या इंजिनिअरला फोन केला. त्याने खड्ड्यामुळे नव्हे तर चक्कर येऊन पडल्यामुळे मृत्यू झाल्याचे सांगितले. संजय बडगुजर यांचा परिवार अत्यंत गरीब आहे. धरणगाव नागरिक तर मदत करतीलच. परंतू त्यांना ठेकदारकडूनही आर्थिक मदत मिळालीच पाहिजे. अन्यथा ठेकेदाराविरुद्ध सदोष मनुष्यवधाचा गुन्हा करण्याची आमची आक्रमक भूमिका राहील.
-नगराध्यक्ष निलेश चौधरी (माजी लोकनियुक्त, धरणगाव)
