जळगाव (प्रतिनिधी) लघुशंकेला थांबलेल्या वकीलाला दुचाकीवरुन आलेल्याने तीस रुपये मागितले. परंतु ते चारचाकीमध्ये बसून भुसावळकडे रवाना होत असतांना पैसे मागणाऱ्याने वकीलाच्या गळ्यातील १ लाख १० हजार रुपयांची सोनसाखळी जबरीने चोरुन नेली. ही घटना दि. ५ जुलै रोजी रात्री अकरा वाजेच्या सुमारास नशिराबाद गावाजवळील महामार्गावर घडली. याप्रकरणी नशिराबाद पोलिसात गुन्हा दाखल करण्यात आला आहे.
भुसावळातील शिवकॉलनी पसिरात प्रकाश रामदास मोझे (पाटील) (वय ६३) हे वकील वात्त्सतव्यास असून ते जळगाव न्यायालयात वकीली करतात. दि. ५ जुलै रोजी ते कामानिमित्त जळगाव येथे आले होते, काम आटोपून ते (एमएच १९, बीजे ७३६१) क्रमांकाच्या कारने रात्री साडेदहा वाजेच्या सुमारास घरी जाण्यासाठी निघाले. राष्ट्रीय महामार्गावरील मेरीमाता चर्चजवळ ते लघुशंका करण्यासाठी थांबले. घरी जाण्यासाठी ते पुन्हा गाडीत बसले असता, एक अनोळखी दुकीस्वार त्यांच्याजवळ आला.
चोरट्याने प्रकाश मोझे यांना विलास पाटील, साकेगाव असा आवाज देवून मला पटकन तीस रुपये द्या, असे म्हणत होता. दरम्यान, मोझे हे गाडी सुरु करीत असतांना त्या दुचाकीस्वार चोरट्याने दोन्ही हातांनी मोझे यांच्या गळ्यातील १ लाख १० हजार रुपयांची सोन्याची चैन जबरदस्तीने ओढून चोरटा तेथून पसार झाला. प्रकाश मोझे यांनी चारचाकीने चोरट्याचा पाठलाग केला. मात्र तो उड्डाणपुलाच्या खालून नशिराबाद गावात शिरुन गल्लीबोळातून गावात पसार झाला. दरम्यान, मोझे यांनी शनिवारी नशिराबाद पोलिसात धाव घेत तक्रार दिली. त्यांच्या तक्रारीवरुन अज्ञात चोरट्याविरुद्ध गुन्हा दाखल करण्यात आला आहे.
