जळगाव (प्रतिनिधी) जिल्ह्यात पुन्हा एकदा कोरोनानं डोकं वर काढले आहे. असे असताना देखील विना मास्क फिरणारे, गर्दी करणाऱ्यांवर कारवाईसाठी आज जिल्हाधिकारी अभिजीत राऊत, पोलिस अधिक्षक डॉ. प्रविण मुंडे चक्क रस्त्यावर उतरले. यावेळी विना मास्क फिरणाऱ्यांवर जागेवरच कारवाई करण्यात आली. तर पन्नास जणांवर विना मास्क फिरणे व सामाजीक अंतर न पाळणे याप्रकरणी जागेवरच दंडही केला आहे.
सकाळी दहा ते बारा दरम्यान शहरातील सर्व व्यापारी संकुलात फिरून जिल्हाधिकारी राऊत, पोलिस अधिक्षक डॉ. प्रविण मुंडे यांनी नियम मोडणाऱ्यांवर कारवाईचा बडगा उचलला. आज सकाळी दहाच्या सुमारास जिल्हाधिकारी राऊत, पोलिस अधिक्षक डॉ. मुंडे, मुख्य कार्यकारी अधिकारी डॉ. बी. एन. पाटील, आयुक्त सतीश कुलकर्णी, उपायुक्त वाहुळे, शहर वाहतूक पोलिस निरीक्षक देविदास कुनगर, तहसिलदार नामदेव पाटील, मंडळाधिकारी योगेश नन्नवरे, तलाठी व पोलिस कर्मचारी उपस्थित होते. जिल्हाधिकारी राऊत हे स्वतः रस्त्यावरव उतरल्याने धावपळ सुरू झाली होती. फुले मार्केट, महात्मा गांधी मार्केट, चित्रा टॉकीज परिसर, नवीपेठ, गोलाणी मार्केट परिसरात फिरून विना मास्क फिरणारे, गर्दी करणाऱ्यांवर जागेवरच कारवाई केली. जिल्हाधिकारी राउत, डॉ. मुंडे यांनी व्यापाऱ्यांना विना मास्क येणाऱ्यांना माल देवू नका अशी सूचना केली.
कोरोना बाधीतांची संख्या जळगाव शहरात सर्वाधिक आहे. नागरिक विना मास्क फिरताहेत, गर्दी करताताहेत, सामाजीक अंतर पाळत नाही यामुळे कोरोना संसर्ग जलद गतीने वाढतोय. यावेळी पोलिसांनी विना मास्क फिरणाऱ्यांना पकडून जागेवरच पाचशे रूपयांचा दंड केला. यामुळे विना मास्क फिरणारे पोलिसांना पाहून पळ काढत होते.
