मुक्ताईनगर प्रतिनिधी । माजी मुख्यमंत्री तथा सध्याचे विरोधी पक्षनेते देवेंद्र फडणवीस यांची भाजपाच्या बिहार प्रभारीपदी निवड झाली आहे. याबद्दल फडणवीसांना शुभेच्छा मात्र आता तेथे जाऊन तिकीटांची कापाकूप करु नका, असा टोला एकनाथराव खडसे यांनी लगावला. ते सुनील नेवे लिखीत ‘जनसेवेचा मानबिंदू’ पुस्तक प्रकाशन सोहळ्याप्रसंगी बोलत होते. तसेच लवकरच ‘नानाजी फडणवीसांचे बारभाई कारस्थान’ यावर पुस्तक लिहीणार असल्याचे नाथाभाऊ यांनी सांगितले.
पुढे खडसे म्हणाले की, आमचा मुख्यमंत्री ड्रायक्लिनर होता, सरकारमध्ये कोणावरही आरोप झाले की लगेच क्लिनचिट द्यायचा, मी निर्दोष असताना क्लिन चिट दिली नाही. देवेंद्र फडणविस दमानिया यांना वेळ देत होते, पण मला नाही. मात्र नाथाभाऊ अन्याय सहन करणारा नाही, मी स्वस्थ बसणारा नाही. पक्षाच्या नेत्याकडून न्याय मिळत नाही तोपर्यंत भांडणार, असल्याचेही ते म्हणाले. यावेळी केंद्रीय मंत्री नितीन गडकरी, रावसाहेब दानवे, माजी मंत्री सुधीर मुनगंटीवार, विधानसभेचे माजी अध्यक्ष हरिभाऊ बागडे यांनी या पुस्तकाचे ऑनलाईन प्रकाशन केले.
यावेळी चंद्रपूरहून मुनगंटीवार म्हणाले की, कार्यकर्त्यांवर भावाप्रमाणे प्रेम करणारा नेता म्हणून खडसेंची ओळख आहे. विरोधी पक्षात असतांना त्यांनी तत्कालीन सरकारवर केलेले आरोप टीका हे त्यांचे शब्द नव्हते. तर बाण होते. त्यांच्या अभ्यासपूर्ण भाषणामुळे त्यांन अनेक जनहिताचे निर्णय घेण्यास त्या त्या सरकारला भाग पाडले. ते विरोधी पक्षात असतांना अनेकदा त्यांच्या निवासस्थानी बैठका होत. पण प्रदेशाध्यक्ष म्हणून त्यांच्या घरी गेलो असता ते खुर्चीवरुन उठून मला त्या खुर्चीवर जागा देत एवढे ते मोठे आहेत. ना कुठला अहंकार ना गर्व असे त्यांचे व्यक्तीमत्व. रावसाहेब दानवे व हरिभाऊ बागडे यांनीही मनोगतात खडसेंनी पक्षासाठी दिलेल्या योगदानाचा गौरवपूर्ण उल्लेख केला.
प्रकाशन सोहळ्यात पुढे एकनाथराव खडसे म्हणाले की, अनेक लोक सांगतात, नाथाभाऊवर पक्ष अन्याय करतोय, त्यांचं काहीतरी अडकलं असेल म्हणून पक्ष सोडत नाही, पण स्पष्ट करतो माझं काही अडकलेलं नाही, माझा जीव पार्टी सोबत लागला आहे. म्हणून सहन करतोय. पर्याय भरपूर आहेत, असे सांगून त्यांनी बंडाचा इशारा दिला. आमचा मुख्यमंत्री ड्रायक्लिनर होता. सरकारमध्ये कोणावरही आरोप झाले की लगेच क्लिनचिट द्यायचा. मात्र मी निर्दोष असताना क्लिन चिट दिली नाही. नितीन गडकरी, रावसाहेब दानवे, सुधीर मुनगंटीवार, हरिभाऊ बागडे हे आमचे नेते शुभेच्छा देताना म्हणतात, नाथाभाऊचे कार्य, योगदान मोठे आहे, नाथाभाऊ चांगला होता तर पक्षाने तिकीट का दिले नाही. असो मुंडे आज हयात असते तर महाराष्ट्राचे चित्र वेगळे असते. गोपीनाथ आणि एकनाथ एक आहेत अशी गोपीनाथ मुंडे यांची भूमिका होती असेही ते म्हणाले.
यावेळी महानंदच्या अध्यक्षा मंदाकिनी खडसे, खासदार रक्षा खडसे, भाजप जिल्हाध्यक्ष तथा आमदार सुरेश भोळे, जिल्हा बॅँक अध्यक्षा ऍड. रोहिणी खडसे-खेवलकर, आमदार संजय सावकारे, महामंडलेश्वर जनार्दन महाराज, महंत प्रभाकरशास्त्री महाराज, स्वामी शास्त्री भक्तीप्रकाश दास, माजी आमदार गुरुमुख जगवाणी, माजी आमदार चैनसुख संचेती, प्रभारी सभापती विद्या पाटील, नगराध्यक्षा नजमा तडवी, जि.प.अध्यक्षा रंजना पाटील, माजी जि.प.अध्यक्ष अशोक कांडेलकर, उपाध्यक्ष लालचंद पाटील, जि.प.शिक्षण व आरोग्य सभापती छोटू पाटील, सावदा नगराध्यक्षा अनिता येवले, आरपीआय नेते रमेश मकासरे, अथर्व पब्लिकेशनचे सुदाम माळी, माजी जि.प.अध्यक्ष दिलीप खोडपे, बााजर समिती सभापती निवृत्ती पाटील, मुक्ताईनगर पं.स.सभापती विद्या पाटील आदी उपस्थित होते. प्रास्ताविक प्रा.नेवे, सूत्रसंचालन वैशाली कोल्हे यांनी तर आभार सरपंच मनीषा देशमुख यांनी मानले.
