जळगाव / मुक्ताईनगर ( प्रतिनिधी ) – कथित दुर्मिळ वस्तूंचे व्हिडिओ सोशल मीडियावर व्हायरल करत मोठ्या नफ्याचे अमिष दाखवून लोकांना गंडा घातला जात होता. जळगाव पोलिसांनी शुक्रवारी पहाटे मुक्ताईनगर तालुक्यातील कुप्रसिध्द पाच गावातील संघटित गुन्हेगारांना लक्ष केले. ऑपरेशन ड्रॉप केस मोहिम राबवित वॉन्टेड आरोपींच्या मुसक्या आवळल्या. २० लाखाची रोकड, ३०० ग्रॅम वजनाचे ३० लाखाचे सोने, चार किलो वजनाची सुमारे ८ लाखाची चांदीसह अन्य मुद्देमाल हस्तगत केला. जिल्ह्यात हा पोलिसांचा सर्वात मोठा सर्जिकल स्ट्राईक होता. गुन्ह्यांच्या पार्श्वभूमीवर जळगाव पोलिसांनी उचललेले हे पाऊल महत्त्वपूर्ण मानले जात असुन गुन्हेगारांमध्ये धडकी भरणारी कृती ठरली आहे.
मुक्ताईनगर तालुक्यातील लाल गोटा, हलखेडा, मधापुरी, जोंधनखेडा तसेच चारठाणा या गावांमध्ये पोलिसांनी पहाटेच्या प्रहरी या गुन्हेगारीवर सर्जिकल स्ट्राईक राबवली आहे. गेल्या अनेक वर्षापासुन विशिष्ट प्रकारच्या गुन्ह्यांमध्ये ही पाच गावे चर्चेत आहेत. विशेष म्हणजे अल्प लोकसंख्या असलेल्या या गावांमधून सोशल मीडियाच्या माध्यमातून देशभरातील लोकांना जाळ्यात ओढून त्यांची फसवणूक केल्याच्या घटना समोर येत होत्या. व्हिडिओंना भुललेले लोक गावात पोहोचल्यानंतर त्यांना नकली नोटा दिल्या जात होत्या. बनावट किंवा खोट्या मौल्यवान वस्तु दाखवून लाखो रुपयांची फसवणुक केली जात होता. धक्कादायक बाब म्हणजे काही प्रकरणांमध्ये पीडित व्यक्तींकडे बनावट हरणाचे किंवा वाघाचे कातडे ठेवून त्यांचे व्हिडिओ चित्रीत करुन तक्रार दिल्यास वन्यजीव तस्करीच्या गुन्ह्यात अडकवू असे धमकाविले जात होते. मागील तीन वर्षांत या परिसरात दाखल झालेल्या गुन्ह्यांत दरोडा १०, खुनासह दरोडा एक, खून एक, जबरी चोरी सात, फसवणूक १६, दरोड्याचा प्रयत्न एक, सरकारी कर्मचाऱ्यावर हल्ला दोन असे गुन्हे दाखल झाले आहेत.
मोठ्या कारवाईत मोठा ताफा
जिल्हा पोलीस अधीक्षक श्रीकांत धिवरे पोलीस अधीक्षक यांच्या मार्गदर्शनाखाली राबविलेल्या सर्जिकल स्ट्राइक मोहिमेत भुसावळ उपविभागीय पोलीस अधिकारी केदार बारबोले, परिविक्षाधीन उपविभागीय पोलीस अधिकारी प्रशांत दरेकर, एलसीबीचे पोलीस निरीक्षक राहुल गायकवाड, भुसावळ शहरचे पोलीस निरीक्षक महेश गायकवाड, भुसावळ तालुकाचे पोलीस निरीक्षक निलेश गायकवाड, भुसावळ शहरचे राहुल वाघ, बोदवड पोलीस ठाण्याचे पोनि आशिष लव्हांगळे, सावदा पोलीस ठाणे सपोनि विशाल पाटील, नशिराबाद पोलीस ठाणे सपोनि योगिता नारखेडे, निंभोरा पोलीस ठाणे पो. नि. मीरा देशमुख, वरणगाव पोलीस ठाणे सपोनि अमित कुमार बागुल यांच्यासह आरसीपी, २०० अंमलदार यात सहभागी झाले होते.
