अकोला (प्रतिनिधी) डॉ.पंजाबराव उपाख्य भाऊसाहेब देशमुख यांच्या शतकोत्तर रौप्य महोत्सवी वर्षानिमित्त श्री शिवाजी शिक्षण संस्था अमरावती द्वारा संचालित विविध महाविद्यालयाद्वारे डॉ. पंजाबराव देशमुख यांच्या जीवन कार्यावर आधारित एकूण १२५ व्याख्यानांचे आयोजन करण्यात आले आहे. या अनुषंगाने डॉ. गोपाळराव खेडकर महाविद्यालय गाडेगाव, तेल्हारा व श्री संत गजानन महाराज कला महाविद्यालय बोरगाव मंजू यांच्या संयुक्त विद्यमाने श्री संत गजानन महाराज कला महाविद्यालय बोरगाव मंजू येथे व्याख्यानाचे आयोजन गुरुवार दिनांक 19 ऑक्टोबर 2023 रोजी करण्यात आले होते.
कार्यक्रमाच्या अध्यक्षस्थान प्राचार्य डॉ. पूजाताई सपकाळ प्राचार्य श्री संत गजानन महाराज कला महाविद्यालय बोरगाव मंजू यांनी भूषवले. प्रमुख वक्ते म्हणून प्रा. डॉ. गजानन वाकोडे, संचालक लोकसेवा करिअर अकॅडमी, अकोला तसेच दुसरे वक्ते प्रा. डॉ. धीरजकुमार नजान हे उपस्थित होते. प्रमुख अतिथीमध्ये प्राचार्य गोपाल ढोले, डॉ. गोपाळराव खेडकर महाविद्यालय गाडेगाव, तेल्हारा हे प्रामुख्याने उपस्थित होते. विशेष निमंत्रितांमध्ये अँड. विश्वासराव नेरकर, आजीवन सभासद श्री शिवाजी शिक्षण संस्था अमरावती, तसेच प्रमुख उपस्थितीमध्ये प्रा. डॉ. राहुल सुडके हे मंचावर उपस्थित होते.
कार्यक्रमाची सुरुवात दीप प्रज्वलन व प्रतिमापूजनाने करण्यात आली. त्यानंतर डॉ. गोपाळराव खेडकर महाविद्यालयाचे प्राचार्य डॉ. गोपाल ढोले यांनी श्री संत गजानन महाराज कला महाविद्यालय बोरगाव मंजू च्या प्राचार्य डॉ. पूजाताई सपकाळ यांना भाऊसाहेबांची प्रतिमा व भाऊसाहेबांच्या प्रबंधावर आधारित ग्रंथ महाविद्यालयाला भेट म्हणून दिला. प्रा. डॉ. राहुल सुडके यांनी आपल्या प्रस्ताविकामधून श्री शिवाजी शिक्षण संस्था अमरावती विस्तार व कार्याची ओळख विद्यार्थ्यांना करून देत कार्यक्रमाच्या आयोजनाचा उद्देश आणि कारण मीमाणसा विशद करीत उपस्थित मान्यवरांचा परिचय करून दिला.
प्रा. डॉ. गजानन वाकोडे यांनी आपल्या विशेष शैलीतून विद्यार्थ्यांना डॉ. पंजाबराव उपाख्य भाऊसाहेब देशमुख यांचे विचार आजही कसे तंतोतंत उपयोगी पडतात हे उदाहरणासह पटवून दिले. डॉ. भाऊसाहेब देशमुख यांच्या कर्तुत्वामुळे महाराष्ट्रातीलच नव्हे तर संपूर्ण देशवासी शैक्षणिक, सामाजिक, आर्थिक तसेच राजकीय दृष्ट्या संपन्न झाल्याचे प्रतिपादन त्यांनी केले. भाऊसाहेबांच्या कृषी क्रांतीमुळे संपूर्ण मानव जातच त्यांची सदैव ऋणी राहील असे महत्त्वपूर्ण उदगार याप्रसंगी त्यांनी काढले. दुसरे वक्ते प्रा. डॉ. धीरजकुमार नजान यांनी समायोचित विचार मांडत भाऊसाहेबांच्या जीवनातील प्रसंग उजागर करत भाऊसाहेबांचे दर्शन घडविले.
प्राचार्य डॉ. पूजाताई सपकाळ यांनी आपल्या अध्यक्षीय भाषणातून भाऊसाहेब देशमुख यांची थोरवी सांगत विद्यार्थ्यांनी भाऊसाहेबांच्या प्रेरणेतून स्वतःला घडवावे आणि देशासाठी उपयोगी येण्याचे आवाहन विद्यार्थ्यांना केले. तसेच भाऊसाहेबांचे थोर विचार विद्यार्थ्यांपर्यंत पोहोचवण्यासाठी श्री शिवाजी शिक्षण संस्था अमरावती व प्राचार्य डॉ. गोपाल ढोले यांचे विशेष आभार मानले.
कार्यक्रमाचे सूत्रबद्ध संचालन प्रा. पुरुषोत्तम निर्मळ यांनी केले तर आभार प्रदर्शन प्रा. डॉ. डि. के. राठोड यांनी केले. कार्यक्रमामध्ये प्रा. डॉ. ए. एन. फरफट, प्रा. अविनाश शेटे प्रा. डॉ. किर्दक तसेच सर्व शिक्षक व शिक्षकेतर कर्मचारी तसेच विद्यार्थी मोठ्या संख्येने उपस्थित होते. कार्यक्रमाच्या यशस्वी आयोजनाकरिता महाविद्यालयाच्या सर्व घटकांनी तसेच मंगेश देवतळे व शैलेश फोकमारे यांनी विशेष परिश्रम घेतले.
