यावल (प्रतिनिधी) वादळामुळे तालुक्यातील रिधुरी शेत शिवारात अनेक ठिकाणी झाडे कोसळली होती. त्यात वीज खांबावर पडलेली फांदी काढताना शॉक लागून १८ वर्षीय तरुणाचा मृत्यू झाल्याची दुर्दैवी घटना बुधवारी रात्री घडली.
रिधुरी येथील रहिवासी लोकेश नारायण सोनवणे (वय १८) हा तरुण वीज वितरण कंपनीत रोजंदारीवर कामे करतो. बुधवारी गावात वादळी वाऱ्यासह पाऊस झाला होता. त्यात गावालगत असलेल्या प्रकाश सोनवणे यांच्या शेतात झाडांच्या फांद्या वीज तारांवर पडल्या होत्या. या फांद्या हटवण्याचे काम लोकेश सोनवणे याला सांगितले होते.
खांबावर पडलेली फांदी हटवताना लोकेशला विजेचा मोठा धक्का लागून तो जमीनीवर कोसळला. त्याला तातडीने यावल ग्रामीण रुग्णालयात नेण्यात आले. परंतू डॉ. मोहिनी भुगवाड्या यांनी तपासणी करून त्याला मृत घोषित केले. याप्रकरणी ईश्वर सोनवणे यांच्या खबरीवरून फैजपूर पोलिस ठाण्यात अकस्मात मृत्यूची नोंद करण्यात असून पुढील तपास हवालदार अनिल पाटील हे करत आहे. दरम्यान, या घटनेमुळे रिधुरी गावासह परिसरात देखील हळहळ व्यक्त होत आहे.
