जळगाव (प्रतिनिधी) जळगावहून यावलकडे जात असलेल्या दुचाकीला डंपरने धडक दिल्याने या अपघातात दोन मित्रांचा दुर्दैवी मृत्यू झाला आहे. शुक्रवारी सायंकाळी साडेसहा वाजेच्या सुमारास यावल तालुक्यातील कोळन्हावी फाट्याजवळ हा अपघात झाला. अमोल राजेंद्र पाटील (वय २८, रा. सुप्रिम कॉलनी) याचा जागीच तर जखमी इस्माईल हबीब तडवी (वय ३०, रा. सावखेडा सीम) याचा रात्री साडेबारा वाजेच्या सुमारास उपचारादरम्यान मृत्यू झाला. (Jalgaon Crime News)
जळगावातील सुप्रिम कॉलनी येथे अमोल पाटील हा कुटुंबासह राहतो. शुक्रवारी सायंकाळी अमोल हा त्याचा सावखेडा सीम येथील मित्र इस्माईल हबीब तडवी याच्यासोबत (एमएच १९ डीबी २७४६) या क्रमाकांच्या दुचाकीने कलर घेण्यासाठी यावल येथे जात होते. यावल तालुक्यातील डांभूर्णी गावाजवळील कोळन्हावी फाट्याजवळ (एमएच १९ बीडी ३४६८) या क्रमाकांच्या डंपरने अमोलच्या दुचाकीला धडक दिली. या धडकेत अमोल पाटील याचा जागीच मृत्यू झाला. तर इस्माईल हबीब तडवी हा गंभीर जखमी झाला. जखमी झालेल्या इस्माईल याला तातडीने जिल्हा शासकीय वैद्यकीय महाविद्यालयात दाखल करण्यात करण्यात आलं आहे. अपघातानंतर डंपरचालक घटनास्थळाहून पसार झाला होता. या प्रकरणी मयत अमोलचे काका राजू शामराव पाटील यांनी दिलेल्या तक्रारीवरुन एमएच १९ बीडी ३४६८ या क्रमाकांच्या डंपरवरील चालकाविरोधात यावल पोलीस ठाण्यात गुन्हा दाखल करण्यात आला आहे.
