पुणे (वृत्तसंस्था) पुणे सोलापूर महामार्गावर हडपसर परिसरात नाकाबंदी दरम्यान पोलिसांना एका कारमधून नोटांनी भरलेल्या कोट्यवधींच्या बॅगा जप्त केल्या आहेत. पोलिसांनी एका व्यक्तीला ताब्यात घेतले आहे.
सोमवारी रात्री साधारण साडेअकरा वाजताच्या सुमारास हडपसर परिसरातील शेवाळेवाडी परिसरात असलेल्या द्राक्ष संशोधन केंद्राजवळ नाकाबंदी करत असताना पोलिसांच्या पथकाला एका ब्रीजा कारची तपासणी केली. कारच्या डिकीत काही बॅगा संशयास्पदरित्या आढळून आल्या. बॅग उघडून पाहिले असता त्यात नोटांचे बंडल आढळून आल्यानंतर मात्र, पोलीसही चक्रावले. मध्यरात्री ६ पिशव्यात कोट्यावधी रुपयांची ही रक्कम पुणे पोलिसांना मिळाली. विशेष म्हणजे रोकड सोबत पोलिसांना पैसे मोजण्याचे मशीन मिळाले आहे.
पोलिसांनी कार ताब्यात घेत संशयित गांधी नामक इसमाला हडपसर पोलीस स्टेशनला आणले. त्यानंतर दोन पंचांसमक्ष पंचनामा करून वाहनात मिळून आलेल्या बॅगा तपासल्या असता त्यात एकूण 3 कोटी 42 लाख 66 हजार 220 रुपये मिळून आले. दरम्यान, कारमधील व्यक्तीची चौकशी केली असता त्याने आपली ओळख प्रशांत धनपाल गांधी (वय 47 वर्षे, खत व्यवसाय, दूध व्यवसाय, किराणा दुकान व शेती व्यवसाय (रा. लासूरणे ता. इंदापूर जि. पुणे)अशी सांगितली. दरम्यान, जप्त करण्यात आलेली रोकड हवाल्याशी संबंधित आहे की, १० मे रोजी होणाऱ्या कर्नाटक निवडणुकीच्या पार्श्वभूमीवर ही रोकड पाठवली तर जात नव्हती, याअनुषंगाने पोलिसांनी आता तपास सुरु केला आहे
