चाळीसगाव (प्रतिनिधी) शहरात महाराणा प्रताप चौक कॉलेज पॉईंट येथे वीर शिरोमणी महाराणा प्रताप यांचा पूर्णाकृती पुतळा व्हावा, या मागणीचे निवेदन गेल्या आठवड्यात सर्व राजपूत समाज संघटना व महाराणा प्रताप प्रेमी नागरिकयांच्यावतीने चाळीसगाव नगरपालिकेच्या उपमुख्य अधिकारी फरतडे यांना देण्यात आले. दरम्यान, आज खासदार उन्मेशदादा पाटील यांना सर्व संघटनांनी प्रत्यक्ष भेटून निवेदनाद्वारे आपण यात प्रयत्न करावेत, अशी मागणी केली.
तसेच समाज संघटनांच्या प्रतिनिधींच्या मागणीला सकारात्मक प्रतिसाद देत उन्मेशदादा पाटील यांनी लागलीच नगराध्यक्षांनी या विषयासाठी तातडीची मिटींग बोलून तसा ठराव मंजूर करून घ्यावा, अशा सूचना केल्या. व नियोजित जागे संदर्भात काही तांत्रिक अडचणी आहेत की काय यासाठी सार्वजनिक बांधकाम विभाग, राष्ट्रीय महामार्गच्या संबंधित अधिकाऱ्यांशी दूरध्वनीद्वारे चर्चा करून माहित घेतली. पुतळा उभारणीसाठी फारशी अडचण येणार नाही असे संघटनांच्या प्रतिनिधींना सांगून शहरात महापुरुषांचे पुतळे व्हावेत, हे माझे स्वप्न असल्याचे देखील सांगत पुतळ्यांमुळे महापुरुषांच्या इतिहासाला उजाळा मिळून पुढील पिठीला प्रेरणा मिळेल, असेही यावेळेस खासदार उन्मेशदादा पाटील यांनी सांगितले. यावेळी राजपूत समाजातील अनेक संघटना त्यांचे प्रतिनिधी, नगरसेवक, माजी नगरसेवक, युवक वर्ग, महिला प्रतिनिधी मोठ्या संख्येने उपस्थित होते.
