मुंबई (वृत्तसंस्था) बॉलिवूड अभिनेता आणि राजकीय नेते परेश रावल यांना कोरोनाची लागण झाली आहे. परेश रावल यांनी स्वतः सोशल मीडियाच्या माध्यमातून याबद्दलची माहिती दिली आहे. याबद्दलची माहिती देत आपल्या संपर्कात आलेल्या लोकांनी स्वतःची कोरोना चाचणी करून घ्यावी असा सल्लाही त्यांनी दिला आहे. दरम्यान परेश रावल यांनी काही दिवसांपूर्वी कोरोना लसीचा पहिला डोस घेतला होता.
दुर्दैवाने, माझी कोव्हिडची सकारात्मक चाचणी आली आहे. गेल्या दहा दिवसात माझ्याशी संपर्कात आलेल्या सर्वांनी कृपया त्यांची कोरोना चाचणी करुन घ्यावी, असे ट्वीट परेश रावल यांनी केले आहे. त्यांच्या या ट्वीटनंतर अनेक चाहत्यांनी त्यांना बरे होण्यासाठी शुभेच्छा दिल्या आहेत. दरम्यान परेश रावल यांनी काही दिवसांपूर्वी कोरोना लसीचा पहिला डोस घेतला होता. त्यांनी लस घेतानाचा एक फोटोही सोशल मीडियावर शेअर केला होता. V for vaccines, सर्व डॉक्टर, नर्स, फ्रंटलाईन वर्कर्स आणि शास्त्रज्ञांचे आभार, असे ट्वीट त्यांनी केले होते. परेश रावल यांनी ९ मार्चला कोरोना लस घेतली होती. त्यानंतर १८ दिवसांनी त्यांना कोरोनाची लागण झाली आहे.
देशात कोरोना रुग्णांच्या संख्येत पुन्हा एकदा झपाट्यानं वाढ होत असल्याचं पाहायला मिळत आहे. मागील काही दिवसात बॉलिवूडमधील अनेक कलाकारांनाही कोरोनाची लागण झाल्याचं समोर आलं आहे. यात आमिर खान, कार्तिक आर्यन, आर माधवन, मिलिंद सोमन, रणबीर कपूर, संजय लिला भन्साळी, सिद्धार्थ चतुर्वेदी यांच्यासह इतरही काही नावं आहेत.
