जळगाव (प्रतिनिधी) जळगाव जिल्हा रुग्णालयात मेमोग्राफी मशीन व फेको मशीनसह इतर मशिनरी खरेदी करताना मोठ्या प्रमाणात अपहार झाला आहे. यासंदर्भात सिव्हील सर्जन यांच्यावर फौजदारी स्वरुपाची कारवाई करण्यात यावी, अशा आशयाची तक्रार शिवसेनेचे गजानन मालपुरे यांनी जिल्हाधिकारी अभिजीत राऊत यांच्याकडे केली आहे. विशेष म्हणजे संबंधीचे सर्व पुरावे देण्यास तयार असल्याचे देखील तक्रारी अर्जात श्री. मालपुरे यांनी नमूद केले आहे.
गजानन मालपुरे यांनी जिल्हाधिकाऱ्यांकडे केलेल्या तक्रारीत म्हटले आहे की, जळगाव जिल्हा रुग्णालयात मॅमोग्राफी मशीन, फेको मशीनसह इतर मशिनरी खरेदी करताना मोठ्या प्रमाणात अपहार झाल्याचे दिसून येत आहे. सदर मशनरी एकाच व्यावसायिकाकडून खरेदी करण्यात आलेल्या आहेत. सदर मशनरीची बिले घेताना बिलांमध्ये मॅन्युफॅक्चरिंग कंपनीचे नाव सारख्या अत्यावश्यक गोष्टी देखील नमूद केलेल्या नाहीत. त्यामुळे आम्ही ऑनलाईन मशीनच्या किमती बघितले असता जिल्हा ग्रामीण रुग्णालय आणि घेतलेल्या मशनरीच्या किमती व ऑनलाइन असलेल्या किमतीमध्ये प्रचंड तफावत दिसून येत आहे. तरी सदरचे सिव्हील सर्जन नागोजी चव्हाण यांनी खरेदी केलेल्या मशिनरीच्या किमतींमध्ये तफावत असल्यामुळे त्यात मोठ्या प्रमाणात अपहार झाल्याचे दिसते. सदर प्रकरणाची तज्ञ लोकांची समिती नेमून मशिनरी खरेदीसाठी व इतर रुग्णांसाठी अत्यावश्यक सर्व बाबींची चौकशी करण्यात यावी. तालुक्याच्या ठिकाणी मशिनरी खरेदी करून दोन-तीन वर्ष होऊन देखील त्या हाताळणाऱ्या तज्ञ व्यक्ती डॉक्टर उपलब्ध नसताना सदरच्या मशिनरी खरेदी करून शासनाच्या पैशांचा अपव्यय केल्याचे दिसते. या सर्व बाबींची सविस्तर चौकशी करून सिव्हील सर्जनसह दोषी व्यक्तींवर फौजदारी व शासकीय नियमानुसार कारवाई करण्यात यावी. याबाबतचे सविस्तर पुरावे योग्य ते पुरावे देण्यास आम्ही तयार आहोत असे देखील मालपुरे यांनी या तक्रारी अर्जात नमूद केले आहे. दरम्यान, या तक्रारी अर्जाच्या प्रत राज्यपालांसह मुख्यमंत्री, आरोग्यमंत्री यांना देखील रवाना करण्यात आलेल्या आहेत.
