मुंबई (वृत्तसंस्था) राज्यसभा आणि विधान परिषद निवडणुकीत अभूतपूर्व यश मिळाल्यानंतर भाजप नेते चंद्रकांत पाटील (BJP leader Chandrakant Pati) यांनी काही नेत्यांसह आज पत्रकार परिषद घेतली. दरम्यान समजने वाले को इशारा काफी है, असं म्हणत त्यांनी सूचक विधान केलं.
राज्यसभा निवडणुकीनंतर विधान परिषद निवडणुकीतही भाजपने महाविकास आघाडीला धक्का दिला. निकालाच्या दुसऱ्याच दिवशी शिवसेनेत उभी फूट पडल्याची दिसत आहे. शिवसेनेचे नेते एकनाथ शिंदे यांच्यासह १७ आमदार नॉटरिचेबल असल्याचे समोर आले आहे. यामुळे आता महाराष्ट्राच्या राजकारण ढवळून निघाले आहे. काही वेळापूर्वीच एकनाथ शिंदे यांनी पहिलीच प्रतिक्रीया ट्विट करुन दिली आहे, या ट्विटर आता भाजपचे प्रदेशाध्यक्ष चंद्रकांत पाटील यांनी प्रतिक्रीया दिली आहे.
‘आम्ही बाळासाहेबांचे कट्टर शिवसैनिक आहोत… बाळासाहेबांनी आम्हाला हिंदुत्वाची शिकवण दिली आहे.. बाळासाहेबांचे विचार आणि धर्मवीर आनंद दिघे साहेबांची शिकवण यांच्याबाबत आम्ही सत्तेसाठी कधीही प्रतारणा केली नाही आणि करणार नाही’ अस ट्विट एकनाथ शिंदे यांनी केले आहे. यावर बोलताना चंद्रकांत पाटील म्हणाले, एकनाथ शिंदेना काय म्हणायचे हे मी काय सांगू समझने वालों को इशारा काफी हैं. शिंदेना कोणाला काय सांगायचे आहे, हे समजले आहे. जे होतं ते चांगल्यासाठी होते. भाजपला ज्यांनी मदत केली त्यांचे मी मनापासून आभार मानतो.
शिवसेनेला त्यांच्याच आमदारांवर विश्वास नाही. रात्री १ वाजता तुम्ही हॉटेल बदलता. भाजपने एकनाथ शिंदेंना कोणताही प्रस्ताव दिलेला नाही, आम्हाला सर्व पक्षांनी मदत केली आहे. जी नाराजी आज शिवसेनेत व्यक्त झाली. उद्या अशी नाराजी काँग्रेस आणि राष्ट्रवादी काँग्रेसमध्येही होऊ शकते असं सूचक वक्तव्य चंद्रकांत पाटील यांनी व्यक्त केले.
