एरंडोल (प्रतिनिधी) तालुक्यातील पिंपळकोठा विभागात असलेले जवखेडा गावात महावितरणतर्फे वीज चोरी रोखण्यासाठी गेलेल्या पथकावर एकाने हल्ला करून कर्मचाऱ्यांना जखमी केले आहे. जखमी कर्मचाऱ्यास तत्काळ जिल्हा शासकीय रूग्णालयातरवाना करण्यात आले आहे.
सविस्तर वृत्त असे की, तालुक्यातील पिंपळकोठा विभागात जवखेडा गावात आज दि. ३० रोजी सकाळी महावितरणचे अभियंता इच्छानंद पाटील, जनमित्र अक्षय महाजन, पंकज येवले, सुनील महाजन यांचे पथक वीज चोरी रोखण्यासाठी गेले होते. याठिकाणी मनोज प्रताप पाटील हा आकडा टाकून वीज चोरी करत असल्याचे पथकाला आढळून आले. पथकाने हा आकोडा काढून टाकल्याने मनोज पाटील यांनी लाकडी दांडक्याने पथकातील काही सदस्यांना मारहाण केली. या मारहाणीत अक्षय महाजन हे जखमी झाले. जखमी अक्षय महाजन यांना एरंडोल ग्रामीण रुग्णालयात प्राथमिक उपचार करून पुढील तपासणीसाठी जळगाव येथे शासकीय वैद्यकीय महाविद्यालयात दाखल करण्यात आले आहे. शेवटचे वृत्त हाती आले तोपर्यंत पोलिसात कुठलीही नोंद झालेली नव्हती.