वर्धा (वृत्तसंस्था) घराच्या कंपाऊंडमधील शौचालयाच्या खिडकीचे जाळीला बांधून असलेल्या कापडी बाहुलीला घराबाहेर दूरवर नेऊन जाळताच घरातील कपड्यांना आग लागल्याचा खळबळजनक दावा हिंगणघाट तालुक्यातील इंझाळा (वेळा) येथील विठ्ठल हिंगे यांच्या परिवाराने केला आहे. दुसरीकडे अंधश्रध्दा निर्मूलन समितीने हा अंधश्रद्धेचा प्रकार असल्याचे सांगितले आहे.
या संदर्भात अधिक असे की, शनिवार, १५ जुलैला सकाळी प्रांगणातील शौचालयाचे खिडकीच्या जाळीला एक कापडी बाहुली बांधून असल्याची माहिती घरच्यांना मिळाली. हिंगे कुटुंबियांना जादूटोण्याचा प्रकार असल्याचा संशय आला. कारण या बाहुलीवरती घरातील छोट्या मुलीचे नाव लिहिले होते. त्यामुळे ही बाहुली तेथून काढण्यात आली. तसेच जादूटोणा किंवा भानामतीचे भीतीमुळे हिंगे कुटुंबियांनी ही जादुटोणेवाली बाहुली जाळण्याचा निर्णय घेतला.
चेटकीण बाहुली हिंगे कुटुंबीयांनी ५० फुट अंतरावर नेऊन जाळली. परंतू ही बाहुली जाळताच तिकडे घराच्या छपरावर वाळत घातलेल्या कपड्यांना तसेच आंतरवस्त्राससुद्धा आग लागल्याची घटना घडली, असा दावा हिंगे कुटुंबियांनी केला आहे. हा जादुटोण्याचाच प्रकार असावा, या दहशतीमुळे सदर कुटुंबिय घाबरले असून झाल्याप्रकाराची माहिती पोलिसांना देण्यात आली. सदर घटनेची माहिती अ. भा. अंधश्रद्धा निर्मुलन समितीचे पदाधिकाऱ्यांना देण्यात आली असून त्यांनी घटनास्थळी भेट देऊन पाहणी केली. हा प्रकार अंधश्रद्धेतून घडला असून यात तत्थ नसल्याचे सांगितले आहे.
तसेच सदर प्रकरण चौकशीत असून प्रथमदर्शनी हा अंधश्रद्धेचा प्रकार दिसून येत असून पुढील तपास सुरू पोलीस करत आहेत. घरातील कपडे पेटण्याची घटना जादूटोण्याच्या किंवा भानामतीच्या प्रकारातून घडली असल्याची हिंगे कुटुंबासह गावकऱ्यांची धारणा आहे. यामुळे संपूर्ण गावात प्रचंड दहशत पसरली आहे. पोलीस चौकशीत काय समोर येते?, याकडे गावकऱ्यांचे लक्ष लागले आहे.
