औरंगाबाद (वृत्तसंस्था) एकाने मित्राच्या मदतीने प्रेयसीच्या पतीला भयंकर मृत्यू दिल्याची घटना शफेपूर गावात घडली असून, एकच खळबळ उडाली आहे. अनैतिक संबंधातून झालेल्या वादावादीनंतर आरोपीने आपल्या साथीदाराच्या मदतीने प्रेयसीच्या पतीची निर्घृण हत्या केल्यानंतर त्याच्या शरीराचे कंबरेपासून दोन तुकडे केले आहेत. याप्रकरणी औरंगाबाद ग्रामीण पोलीस ठाण्यात गुन्हा दाखल करण्यात आला असून पोलिसांनी दोन जणांना अटक केली आहे.
सुनील हरणकाळ आणि छोटू मोकशे असं अटक करण्यात आलेल्या आरोपींची नावं आहेत. तर संदीप मोकशे असं निर्घृणपणे हत्या झालेल्या मृत व्यक्तीचं नाव आहे. दोन्ही आरोपी आणि मृत असे तिघेही औरंगाबाद जिल्ह्याच्या शफेपूर गावातील रहिवासी आहेत. मृत संदीप मोकशे याच्या पत्नीचं गावातील एका व्यक्तीसोबत अनैतिक संबंध सुरू होते. मागील बऱ्याच दिवसांपासून सुरू असलेल्या या अनैतिक संबंधाची माहिती संदीप मोकशे यांना मिळाल्यानंतर, त्यांच्या पत्नीच्या प्रियकराशी जोरदार भांडण झालं. या वादानंतर पत्नीच्या प्रियकराने अनैतिक संबंधात अडसर ठरणाऱ्या संदीप यांच्या हत्येचा कट रचला. त्यानुसार आरोपी प्रियकराने गावातील अन्य एकाच्या मदतीने संदीप मोकशे यांची निर्घृण हत्या केली.
मृतदेह पाहून पोलीस देखील हादरले
नराधम आरोपी एवढ्यावरच थांबले नाहीत. तर त्यांनी मृतदेहाचे दोन तुकडे करत पुरावा नष्ट करण्याचा प्रयत्न केला. हत्येची ही थरारक घटना उघडकीस येताच परिसरात खळबळ उडाली आहे. मृतदेहाचा झालेली अवस्था पाहून पोलीस देखील हादरले आहेत. या प्रकरणी पोलिसांनी गावातील सुनील हरणकाळ आणि छोटू मोकशे अशा दोन आरोपींना अटक केली आहे. या घटनेचा पुढील तपास औरंगाबाद ग्रामीण पोलीस करत आहेत.
