नवी दिल्ली (वृत्तसंस्था) उत्तर प्रदेशातील लखनऊ आणि उन्नावच्या नवाबगंज येथे असलेल्या राष्ट्रीय स्वयंसेवक संघाच्या कार्यालयांना बॉम्बने उडवून देण्याची धमकी देण्यात आली आहे. या संदर्भात लखनऊमधील मादियानव पोलीस ठाण्यात एफआयआर दाखल करण्यात आला आहे.
अलीगंज येथे राहणाऱ्या डॉ. नीळकंठ मणी पुजारींना एका विदेशी नंबरवरून ‘व्हॉट्सअ‍ॅप’वर हा धमकीचा मेसेज आला आहे. त्यात लखनऊसमवेत इतर सहा आरएसएसच्या कार्यालयांना बॉम्बने उडवून देण्याची धमकी देण्यात आली होती. हिंदी, इंग्रजी आणि कन्नड भाषेत हे धमकीचे मेसेज मिळाले आहेत. हा मेसेज मिळाल्यानंतर पुजारी यांनी लखनऊमधील मडिगाव पोलीस स्टेशनमध्ये तक्रार दाखल केली आहे. पोलिसांनी या प्रकरणी गुन्हा दाखल केला आहे.
नीळकंठ पुजारी हे सुलतानपूर येथील एका महाविद्यालयात प्रोफेसर म्हणून काम करतात. आरएसएस (RSS) चे जुने स्वयंमसेवक असून अलीगंज येथील आरएसएस सोबत ते काम करतात. रविवारी ५ मे रोजी रात्री त्यांना एका विदेशी मोबाईल नंबरवरून व्हॉट्सअ‍ॅपवर मेसेज आला. त्यात हिंदी, इंग्रजी आणि कन्नड भाषेत आरएसएसचे कार्यालये उडवून देण्याच्या धमक्या देण्यात आल्या होत्या. या धमकीनंतर शिवसेना नेते संजय राऊत यांनी प्रतिक्रिया दिली आहे. अशा धमक्या येत असतात. त्यासाठी सरकार समर्थ असल्याचे राऊत म्हणाले आहेत.
